شێورمەندێ ئاسایشا نەتەوه‌یی یا ئه‌مەریکایێ راگه‌هاند، ئه‌مەریکا نه‌شێت پێشبینیێ بکەت کا رووسیا دێ کەنگی دەست ب «داگیرکرنا ئوکراینایێ» كه‌ت.
شێورمەندێ ئاساییشا نەتەوه‌یی یا ئه‌مەریکایێ جاك سوڵڤان ژ «CNN» را گۆت: «ئەم نه‌شێین رۆژەکا دیارکری پێشبینی بكه‌ین، لێ رووسیا دشێت د هەر رۆژەکێ دا دەست ب داگیرکرنا ئوکراینایێ بکەت و دبیت د ڤێ حه‌فتیێ دا بیت».
سوڵڤان پێشبینی کر، «دبیت کو رووسیایێ پشتی ئۆلیمپیاتێن کو دێ ل 20ێ سباتێ ب داوی هێن دەست ب داگیرکرنا ئوکراینایێ بکەت» ئاماژە ب وێ ژی دا، رێڤەبەرییا سەرۆک جۆ بایدن ژی هێژان ژی دبینیت کو رووسیا دێ «رێیەک دیپلۆماتیک» هه‌لبژێریت.
گۆت ژی: «پێڤاژۆیا کو رووسیا هێزێن خوە ل سەر سنۆرێن ئوکراینایێ کۆم کرینە، ب زەلالی نیشان ددەت کو ده‌لیڤه هه‌یه مۆسکۆ د دەمەکێ پر نێزیک دا گاڤێن لەشکەری یێن مەزن ل دژی ئوکراینایێ بهاڤێژیت».
شێورمەندێ ئاساییشا نەتەوه‌یی یا ئه‌مەریکایێ تەکەز کر ژی، واشنتۆن و ناتۆ ئامادەنە دگه‌ل هەڤپەیمانێن خوە بەرسڤا هەر گاڤەکا لەشکەری بده‌ن.
سوڵڤان گۆت ژی: ئه‌مەریکا و هەڤالبەندێن وێ دێ ئاخا ناتۆیێ پارێزن و سزایان ل سەر رووسیایێ سەپینن، ئەگەر ئەو وه‌لات دەستێوەردانێ د ئوکراینایێ دا بکەت.
ئەڤ داخویانیا شێورمەندێ ئاساییشا نەتەوه‌یی یا ئه‌مەریکایێ، پشتی رۆژەکێ ژ په‌یوه‌ندییا تەلەفۆنی یا سەرۆکێن رووسیا و ئه‌مەریکا، ڤلادیمێر پوتن و جۆ بایدن هات کو دەربارێ رەوشا ئوکراینایێ دا گوفتووگۆ کربوون.
ئه‌مەریکا و هەڤالبەندێن وێ یێن رۆژئاڤایی دبێژن، رووسیا پلان دکەت ئوکراینایێ داگیر بکەت، مۆسکۆ ژی ڤێ یەکێ رەد دکەت.
