یەکیتیا ئەورۆپایێ راگھاند؛ سبە پێنجشەمبێ 24ێ شوباتا 2022یێ، جڤینا بلەزا یەکیتیا ئەورۆپایێ ل سەر رەوشا ئوکراینا و رووسیایێ دێ هێتە ئەنجامدان.
ل ئالیێ دن، جیگرێ شێورمەندێ ئەنجوومەنا ئاساییشا نەتەوی یا ئامەریکایێ بەحسا سزایێن ئامەریکایێ یێن ل ھەمبەر دو بانکێن رووسی کر و گۆت: “ئێدی ئەو بانک نە ل ئامەریکا و نە ل ئەورۆپایێ نکارن کار بکەن.”
دەربارێ دۆرپێچێ دا ژی وەزارەتا دەرڤەیا رووسیایێ راگھاند؛ ئەو ژی دێ وەکە سزایێن ئامەریکایێ، بەرسڤێ دەنە واشنگتۆنێ.
ھەری داوی سەرۆکێ رووسیایێ ڤلادمیر پوتین جودابوونا ھەرێمێن «لوھانسک و دۆنەتسک» ژ ئوکراینایێ و سەرخوەبوونا وان ئیمزا کر و ئەڤ ھەر دو ھەرێم ژ ئالیێ جیۆپۆلتیکێ ڤە ژ بۆ رووسیا و ئوکراینایێ گرنگن.
ئەڤ پێنگاڤا پوتین، بوو جھێ نیگەرانیا وەلاتێن رۆژئاڤا و ئامەریکایێ، کو رەوش بەر ب ئالۆزیێن زێدەتر بر، ژ بۆ ڤێ مژارێ، یەکیتیا ئەورۆپایێ دێ سبە جڤینەکێ ئەنجام دەت.
