بەردەڤکێ وەزارەتا بەرەڤانیێ یا رووسیایێ راگھاند کو ھێزێن وان زێدەتری 70 ئارمانجێن سەربازی کو فرۆکەخانە ژی د ناڤ دا ھەنە، ژناڤ برنە.
رووسیایێ ئیرۆ سەرێ سبەھێ ئێرشەکە بەرفرەھ بۆ سەر ئوکراینایێ دەستپێکر و بەردەڤکێ وەزارەتا بەرەڤانیێ یا رووسیایێ «ئیگۆر کۆناشینکۆڤ» دیار کر کو د ئەنجاما ئێرشێن ھێزێن وان یێن ئەسمانی دا 74 بنکەیێن سەربازی یێن ئوکراینایێ ھاتنە ئارمانجکرن و ژناڤبرن.
ل گۆر گۆتنا بەردەڤکێ وەزارەتا بەرەڤانیێ یا رووسیایێ، ژ 74 بنکەیان «11 بنکەیێن تایبەت یێن فرۆکەیێن شەرکەر بوون«.
ھەر ل گۆر گۆتنا وی بەرپرسێ رووسی، ھەلیکۆپتەرەکا سەربازی و 4 فرۆکەیێن بێ فرۆکەڤان یێن ئوکراینایێ ھاتنە تێکبرن.
ل ئالیێ دن ئارتێشا ئوکراینایێ راگھاند، ھەتا نھا 50 «داگیرکەرێن رووسی» ھاتنە کوشتن و ھەری کێم 6 فرۆکەیێن شەری یێن رووسیایێ ھاتنە خستن، لێ ئەڤ یەک نەھاتیە پشتراستکرن.
رووسیا ژی داخواز ژ لەشکەرێن ئوکراینایێ دکەت، دەست ژ چەکان بەردەن و بچنە مالێن خوە.
