سەرۆکێ پارتیا نشتمانیا ترک دۆغو پەرنچەک د دەربارێ شەرێ رووسیا و ئوکرانیا دا، ل سەر کانالێن تەلەڤزیۆنی ھەلوەستا خوە ئاشکەرا دکەت و ڤەکری پشگریا رووسیا دکەت. دۆغو پەرنچەک کەسایەتەکێ چەپە، یان سۆسیالیستەک ناسیۆنالیست و کەمالیستە. پەرنچەک دەمەکی دۆستانیا عەبدوللا ئۆجالان دکر و ھەتتا ل «دۆلا بیقاع» سەرەدانا ئۆجالان کربوو. ئۆجالان ژی گەلەک ب گەرمی پێشوازیا وی کریبوو.
دۆغو پەرینچەک د بەرنامەیەکێ تەلەڤزیۆنی دا دبێژیت: ئەم ب ئاوایەکێ ڤەکری پشتگریا روسیا دکەین. ھەروەھا ب ڤێ مەبەستێ شاندەک ژ پارتیا مە سەردانا مۆسکۆیێ کر. د ناڤ ڤێ شاندەیێ دا کارسازێ ناڤدار «ئەتھەم سانجاک» ژی ھەبوو. ھەڤدیتنێن گەلەک گرنگ ئەنجامدان. لگەل هاریکارێ وەزیرێ دەرڤەیێ رووسیایێ دا کۆم بوون. ئەز دکارم بێژم رووسیا ھەلوەستا برێز «تەییب ئەردۆگان» وەفادار نابینیت. رووسیا ژ ھەلوەستا ترکیێ نەرازییە. ئەز نھا زانیاریێن کو شاندەیا مە ل گەل خوە ئانینە ئاشکەرا ناکەم. ستەنبۆل ژ بۆ رووسان گەلەکا ھێژایە. دۆستانیا ترکیێ ژی گەلەکا ھێژایە. چما ستەنبۆل ھەلنەبژارت و بیلارووس ھەلبژارت؟ ئەڤە بۆ ترکیێ پەیامەکە. دبێژیت هەوە باوەریا من تێکبر.
کارساز «ئەتھەم سانجاک» کەسایەتەک بالکێشە. ئەو ب خوە عەسلێ خوە عەرەبە و ژ گوندەکێ باژارێ «سێرتێ»یە، خزماتیەکا وی ل گەل ھەڤژنا ئەردۆگان، ئامینا ئەردۆگان ژی ھەیە. «ئەتھەم سانجاک» د دەما خوەندەڤانیا خوە دا ھەڤالێ «دۆغگو پەرنچەک» بوو و د خەتا پەرنچەک دا سیاسەت دکر. پشتی دەستھلاتداریا ئاکەپێ «ئەتھەم سانجاک» بوو کارساز و رۆژ ب رۆژ مەستر بوو. نھا خوەدیێ کۆمپانیێن ستراستەژیک و گەلەک کانالێن تەلەڤزیۆنیە و پرانیا پرۆژەیێن مەزن د دەستێ «ئەتھەم سانجاک» دا نە.
