سەرۆکێ ئوکراینایێ ڤۆلۆدیمیر زیلینسكی، رەدکرنا ناتۆیێ یا پێکئینانا هەرێمەکا دژەفرینێ ل سەر ئوکراینایێ شەرمەزار کر.
زیلینسكی ل ئه‌كاونتا خوە یا فه‌یسبووكێ بەلاڤ کر:«وەلاتێن ناتۆیێ ڤەگۆتنەک چێکر کو گرتنا ئاسمانێ ئوکراینایێ، دێ بیته سەدەما شەرێ رووسیا ل دژی هەڤالبەندیێ ناتۆیێ».
سەرۆکێ ئوکراینایێ گۆت: «رێبەرێن ناتۆیێ ب رەدکرنا پێكئینانا هەرێما دژەفرینێ، رۆناهییا کەسک دان کو باژار و گوندێن ئوکراینایێ زێدەتر بێن بۆمبەباران کرن».
زیلینسكی لووتکەیا ناتۆیێ یا کو رۆژا ئینیێ هاتییە ل دارخستن و بریارا رەدکرنا پێكئینانا هەرێما دژەفرینێ ل سەر ئوکراینایێ وەک «جڤینەکا لاواز و تەڤلیهەڤ» ب ناڤ کر.
ڤۆلۆدیمیر زیلینسكی سپاسییا وەلاتێن ناتۆیێ ژی كر یێن کو پشتگری دان ئوکراینایێ و گۆت: «ئەز ژ دۆستێن وەلاتێ مە رە ژی سپاسدارم، گەلەک وەلاتێن کو د ناتۆیێ دا نە دۆستێن مەنە و تەڤی وان بریاران ژی، ئالیکارییا مە دکن».
سەرۆکۆمارێ ئوکراینایێ دیار کر، ئەو پشتراستە کو وەلاتێ وی دێ ب سەر بکەڤیت و گۆت: “ژ رۆژا یەکەم یا داگیرکەریێ ڤە، ئەز ب سەرکەتنێ پشتراستم، ئەم دێ شەر كن، ئەم دێ وەلاتێ خوە بپارێزن».
ئەڤ یەک د دەمەکێ دەیە، وەزیرێ دەرڤەیێ ئامەریکا ئانتۆنی بلێنکن دوهی گۆت کو پێكئینانا هەرێمەکا دژەفرینێ ل ئوکراینایێ، دبیت ببیته سەدەما «شەرکێ گشتگیر ل تەڤاهییا ئەورۆپایێ».
هەروها گۆت ژی؛ واشنگتۆن دێ بەردەوام بیت ل سەر کاری دگه‌ل هه‌ڤپه‌یمانێن خوە، ژ بۆ كو ئوکراینا بشێت ل هەمبەر هێرشا رووسیایێ خوە بپارێزیت.
سكرتێرێ گشتی یێ ناتۆیێ یێنس ستۆلتەنبەرگ ژی د کۆنفەرانسەکێ رۆژنامەڤانی یا ل بروکسەلێ گۆت: «هەرێما دژەفرینێ یا ل سەر ئوکراینایێ، نە بژاردەیەکە کو ناتۆ ل بەر چاڤان دگریت».
