د ناڤبەرا دو بەرپرسێن پایەبلند یێن یەپەگێ دا ل سەر مژارا ئێریشا داعشێ یا ل سەر زیندانا «سیناعه» یا «حەسەکێ» شەرەدەڤەک توند رووددەت و هەڤدو ب خایین و ئالیکارێن داعشێ ب ناڤ دکەن.
ل رۆژا 20/1/2022ێ، داعشێ هێرشی زیندانا «سیناعه» یا ل تاخێ گوێران ل حه‌سه‌كێ كر و ب سه‌دان ئه‌ندامێن خوه ژێ ره‌ڤاندن، د ڤێ دەربارێ دا پێگەها «دارکا مازی» هەر د دەستپێکا ئێریشێ دا ب بەلگەیێن زەلال خوەیاکر کو ئێریش ب هەڤکاریا هندەک ئەندامێن یەپەگێ و ب ئاگەهداریا هندەک بەرپرسێن وێ هاتیە کرن، ژبەرکو پێش ئێریشێ وان زانیاری هەبوون کو داعش دێ ئێریشی زیندانێ کەت.
ل سەر ڤێ مژارێ د جڤینەکا رایەدارێن یەپەگێ دا کو ل دەمژمێر 12:00یێ نیڤرۆژا 17/2/2022یێ ل تاخا «ئەلسالحیە» یا باژارێ «حەسەکێ» هاتیە ئەنجامدایین دا، شەرەدەڤ د ناڤبەرا بەرپرسێن یەپەگێ دا روو دایە.
یەک ژ ئامادەبوویێن جڤینا د ناڤبەرا رایەدارێن یەپەگێ دا ژ بۆ پێگەها «دارکا مازی» ئاشکەرا کر، د ڤێ جڤینێ دا شەرەدەڤ و عاجزی د نێڤبەرا هەر یەک ژ «مەحموودە رەش» ئەندامێ فەرمانداریا گشتی یا یەپەگێ و «نووری مەحموود» بەردەڤکێ یەپەکێ دا روودایە.
ڤێ چاڤکانیێ ژ بۆ پێگەها «دارکا مازی» ئاشکەرا کر، د جڤینێ دا «مەحموودە رەش» گازندە ژ «نووری مەحموود» کرنە و گۆتیە وی چما پشتی ئێریشا داعشێ یا ل سەر زیندانا سیناعە تە چەندین جاران باس ل ڤێ یەکێ کرییە کو هندەک کەسێن د ناڤا هێزێن ئەولەکاری و لەشکری یێن یەپەگێ و هێزێن سووریایا دەمۆکراتیک «هەسەد»ێ دا ئالیکاریا داعشێ کریە و ئەڤ کەسانە خیانەتکارن، مەحموودە رەش گۆتیە نووری، ب چ رەنگان نەدبوو ئەڤ ئاخافتنانە ژ دەڤێ تە دەرکەتبانە.
چاڤکانیێن مە هەروەها ئاشکەرا کر، نووری مەحموود ب ئاوایەکێ هەری توند بەرسڤا مەحموودە رەش دەدەت و دبێژیتە وی؛ «من ب تەنێ راستی گۆتیە و بەلگە ژ بۆی ئاخافتنا من و هەڤکاریکرنا داعشێ ئەڤەیە کو هەژمارەک ژ رایەدار و چەکدارێن هێزێن ئەولەکاری و لەشکری یێن یەپەگێ و هێزێن سووریایا دەمۆکراتیک هەسەدێ هاتنە دەستەسەرکرن و نها لێپرسین ل گەل وان دا دهێتە کرن.» پشتی ڤان ئاخافتنان شەرەدەڤ د نێڤبەرا ڤان دو بەرپرسێن پایەبلندێن یەپەگێ دا درووست بوویە و هەڤدو ب خایین تاوانبار دکەن.
