سەرۆکێ ئوکراینا دبێژیت: «گەلێ کو ئەز هه‌لبژارتیمە ژ بۆ خوەرادەستکرنێ بۆ مەرجێن روسیایێ ئامادە نینە، لێ ئەم ئامادەنە داهاتوویا کرێمیا و دۆنباسێ گۆتووبێژ بکه‌ن» هه‌روه‌ها گۆت: ئه‌م ئێدی چ گرنگیێ ب ناتۆیێ ناده‌ین، ژ به‌ر كو ئه‌و ژ رووبرووبوونا دگه‌ل رووسیایێ د ترسیت.
سەرۆکێ ئوکراینا ڤۆلۆدیمیر زیلینسکی بۆ ئاژانسا «فرانس پرێس» ل سەر رەوشا ئوکراینا و مەرجێن رووسیا یێن ژ بۆ راوەستاندنا شەری ئاخڤی.
بەردەڤکێ کرێملنێ دێمتری پیسکۆڤ بەری نها راگه‌هاندبوو، ئەگەر ئوکراینا کرێمیا وەک ئاخا رووسیا ناس بکەت، دانپێدانێ ب سەرخوەبوونا دۆنیتسک و لوهانسکێ بکەت و هەروه‌ها د دەستوورا خوە دا زەلال بکەت کو نابیته ئەنداما چ هه‌ڤپه‌یمانییان و دێ بێئالی مینیت، ئەو دێ هێرشا ل سەر ئوکراینا راوەستینن.
سەرۆکێ ئوکراینا ڤۆلۆدیمێر زیلینسکی ژی ل سەر ڤان مەرجێن رووسیا هەلوەستەکێ ئەرێنی نیشان دا و گۆت: «ئەم ئامادەینە داهاتوویا کرێمیا و دۆنباسێ گۆتووبێژ بکه‌ین و ئەم دشێین چارەسەریەکێ ببینن کا خەلکێ ل وێ هەرێمێ دێ چاوا ژین»!.
زیلینسکی هەروه‌ها ل سەر رەوشا شەر و زێدەبوونا هێرشێن رووسیا ژی گۆت: «گەلێ کو ئەز هه‌لبژارتیم ژ بۆ خوەرادەستکرنێ بۆ مەرجێن روسیا، ئامادە نینە».
زیلینسکی دیار کر، «ئارتێشا رووسیا باژارێ سومی بۆردوومان کر و تۆرا ئێنتەرنێتێ ل ماروپۆل ژناڤ بر».
زیلینسکی ئاماژە ب سۆزێن وەلاتێن ئەورۆپا کر و گۆت، «وەلاتێن رۆژئاڤا سۆزێن خوە ل گەل مە جێ به جێ نەکرنە» و دەربارێ ناتۆیێ ژی تەکەز کر، «ئەم ئێدی چ گرنگیێ ب ناتۆیێ ناده‌ین، ژ به‌ر كو ئه‌و ژ رووبرووبوونا رووسیایێ دترسیت».
