ئسرائیلێ كارتا په‌كه‌كێ ل دژی تركیێ ده‌رخست
ئسرائیلێ ب تركیێ راگه‌هاند، هه‌گه‌ر ئه‌نقه‌ره هاریكاریێن خوه یێن ژ بۆ باسكێ له‌شكه‌ری یێ ته‌ڤگه‌را «حه‌ماسێ» رانه‌وه‌ستینیت، ئسرائیل ژی ئێدی دێ ئاماده بیت پشتگریێ بده‌ته په‌كه‌كێ.
پێگه‌ها «Middle East Monitor» به‌لاڤ كرییه كو ترکیە ژ پشتگرییا موحته‌مه‌ل یا ئسرائیلێ ژ بۆی رێخستنا په‌كه‌كێ نیگه‌رانه، مۆسادێ ژی ژ میتێ را گۆتییه: «هه‌گه‌ر ئه‌نقه‌ره پشتگرییا خوه یا ژ بۆ باسكێ له‌شكه‌ری یێ ته‌ڤگه‌را حه‌ماسا فه‌له‌ستینی قوت نه‌كه‌ت، دبیت كو ئسرائیل ئێدی پشتگریێ بده‌ته په‌كه‌كێ».
چاڤکانیێن ئاگەهدار دان زانین کو شاندەکێ سازییا ئیسخباراتا ئسرائیلێ «مۆسادێ» ل گه‌ل رایەدارێن ئیستخباراتا ترکیێ «میتێ» ل سەر مژارێن ئەولەهیێ هەڤدیتن ئه‌نجام داینه.
شاندا مۆسادێ ژ هەڤکارێن خوە یێن میتێ را گۆتنە: «ئەگەر ئەنقەرە پشتگرییا خوە یا ژ بۆ باسکێ لەشکەری یێ حه‌ماسێ به‌رده‌وام بكه‌ت، ئسرائیل ژی دێ ئامادە بیت هه‌ڤكاریێ ل گه‌ل په‌كه‌كێ بکەت، لێ هه‌گه‌ر ئه‌ڤه چێبووهاریكاریێن ئسرائیلێ بۆ په‌كه‌كێ د سنۆرێ تركیێ دا نابن».
ل گۆری پێگه‌ها «Middle East Monitor» كو ئه‌ڤ ئاگاهی دوهـی رۆژا سێشه‌مبێ 9\3\2022ێ ژ رۆژنامه‌یا «رأی الیوم» ڤه‌گوهاستینه، ئسرائیلێ بریار دایه ب کارتا په‌كه‌كێ یاریێ بكه‌ت و دخوازیت فشارێ ل ترکیێ بکەت کو پشتگرییا خوە بۆ حەماسێ راوەستینیت، هه‌ر چه‌نه‌ده کو تەڤگەرا حه‌ماسێ چ جاره‌كێ پشتگری بۆ باسکێ خوە یێ لەشکەری ژ تركیێ نەخواستییە.
