سەرۆکێ گشتی یێ پارتیا نژادپەرەست یا ترکیێ (مەھەپێ) دەولەت باخچەلی ژ سەردانا سەرۆکێ گشتی یێ «جەهەپێ» کەمال کلچدارۆغلو بۆ دیاربەکرێ دین و ھار بوویە و چ ھات دەڤێ وی گۆتە کلچدارۆغلو. کلچدارۆغلو ژی تەنێ ب ئەمۆژیەکێ بەرسڤا وی دا!
سەرۆکێ گشتی یێ جەهەپێ کەمال کلچدارۆگلو دوھی چوو باژارێ دیاربەکرێ و ھەتا نھا ژی ل وێ دەرێ یە.
کەمال کلچدارۆغلو لگەل سیاسەتمەدار، نوونەرێن سازیێن سڤیل و کۆمەلەیان دا ھەڤدیتن کر. د ناڤ کەسێن کو کلچدارۆغلو لگەل وان دا ھەڤدیتن کر، بابێ سیاسەتمەدارێ گرتی یێ کورد «سەلاحەدین دەمیرتاش» ژی ھەبوو.
کلچدارۆغلو دێ سبە ژی ل دیاربەکرێ بیت و چەندین چالاکی و ھەڤدیتنێن دن بکە.
سەرۆکێ گشتی یێ مەھەپێ دەولەت باخچەلی، کو شریکێ حکوومەتا ترکیێ و ھەڤالبەندێ ئەردۆگانە ژی، ژ بەر سەردانا کلچدارۆغلو بۆ دیاربەکرێ دین و ھار بوو.
باخچەلی ل سەر تویتتەرا خوە چاڤێن خوە گرتن و دەڤێ خوە ڤەکر، چ نەما کو نەگۆتیە کلچدارۆگلو!
باخچەلی گۆت، سەردانا کلچدارۆغلو بۆ دیاربەکرێ ئۆپەراسیۆنەکا سیاسییە ل دژی خەباتێن ترکیێ یێن لھەڤ ئانینا رووسیا و ئوکراینا!
وی نژادپەرەست و نەیارێ کوردان ئەڤ پرسیارە ژ کلچدارۆغلو کر: پشتی دیتنا بابێ «ەرۆریست» دەمیرتاش تو دێ سەردانا مالباتا عەبدوللا ئۆجالان ژی کەی ل رحایێ؟!
باخچەلی بەحسا کوردستانا مەزن ژی کر و وەھا ژ کلچدارۆغلو پرسی: گەلۆ تو حەز دکەی کوردستانا مەزن، کو ژ چار پارچەیان پێک دهێت، ئاڤا ببیت یان نا؟!
کلچدارۆغلو ژی ل سەر تویتتەرا خوە تەنێ ب ئەمۆژیەکێ بەرسڤا وی دا: کەنیا و دەڤێ خوە لێ خوار کر!