پشتی ھەڤدیتنا لگەل وەزیرێ دەرڤەیێ ئووکراینایێ دمیترۆ کولەبایا ل ئانتالیایێ، وەزیرێ دەرڤەیێ رووسیا سەرگەی لاڤرۆڤ د جڤینا رۆژنامەڤانی دا گۆت کو نیەتا وان یا ئێریشکرنا سەر وەلاتەکێ دی نینە و د ئەسلێ خوە دا وان ئێریشی ئووکراینایێ ژی نەکریە.
لاڤرۆڤ ئێریشا سەر ئووکراینایێ پاراست و دا خویاکرن، “مە ب سالان ھشیاری دان، لێ چ کەسەکێ گوھ نەدا مە. لێ بەلێ گەفەک ل دژی رووسیایێ ھەیە.”لاڤرۆڤ ھەروەھا گۆت کو یێن چەکان دشینن ئووکراینایێ ژ چالاکیێن خوە و ژ تەشویقکرنا چەکدارێن کرێکری بەرپرسیارن.
ھەروھا لاڤرۆڤ ل سەر داخوازا سەرۆکێ ئووکراینایێ ڤۆلۆدمیر زەلەنسکی بۆ ھەڤدیتنا لگەل پووتین ژی گۆت: “مە گۆت کو لگەل زەلەنسکی دا ھەڤدیتن دکارە بێ کرن. ژ بۆ ڤێ دڤێ ئامادەکاری بێن کرن. ئەم ل سەر ڤێ ژی ئاخڤین. پووتین ھەر تم ژ بۆ ھەڤدیتنێ ئامادەیە.”
داخویانییێن لاڤرۆڤ وەھا نە:
لاڤرۆڤ: مە د ھەڤدیتنێ دا تەکەز کر کو دەستپێشخەریا مۆسکۆیێ یا ژ بۆ ڤەکرنا رێرەوێن مرۆڤی یێن رۆژانە ل ئوکراینایێ، ھین ژی بەردەوامە.
لاڤرۆڤ: مە بەلگە پێشکێشی نەتەوەیێن یەکگرتی کر کو نەخوەشخانەیا ماروپۆلێ ژ ئالیێ نەتەوەپەرەستێن ئوکراینایێ وەکی بارەگەھەکێ لەشکەری دهێتە بکارئانین.
لاڤرۆڤ: رووسیا ئێرشی ئوکراینایێ نەکر و پلانا ئێریشا ل سەر وەلاتێن دن ژی نەکریە، لێ رووبروویێ رەوشەکێ کو ئەولەھیا وێ دخە مەترسیێ بوویە.
لاڤرۆڤ:یێن کو چەک و چەتە ژ بۆ ئوکراینایێ شاندنە، ئەو ل کریارێن خوە بەرپرسیارن.
لاڤرۆڤ: ئەم دێ ژ ڤێ کریزێ دەرباس بین و ئێدی چ خەیالێن مەیێن کو رۆژئاڤا دکاریت ببیتە ھەڤپارەکێ پێباوەر، نەمایە.
لاڤرۆڤ: مە ل سەر ئەگەرا لدارخستنا ھەڤدیتنا پووتین و زەلەنسکی گۆتووبێژ کر، لێ نابیت کو ھەڤدیتن تەنێ ژ بۆ ھەڤدیتنێ بیت.
لاڤرۆڤ: ئەم دخوازین ئوکراینا بێ ئالی بیت و ئەم ئامادەنە گارانتیێن ئەولەھیێ یێن ئوکراینایێ و گارانتیێن ئەولەھیێ یێن وەلاتێن ئەورۆپی و رووسیایێ گۆتووبێژ بکەین.
