سەرۆککۆمارێ بەرێ یێ ئیرانێ دبێژە، وەلاتێن زلهێز دخوازن سعوودیێ بکن چار پەرچە، ترکیێ بکن سێ پەرچە و ئیرانێ ژی بکن شەش پەرچە.
سەرۆککۆمارێ بەرێ یێ ئیرانێ مەحموود ئه‌حمه‌دی نەژاد د هەڤپەیڤینەکێ دا ل گەل بەشێ ترکی یێ رۆژنامەیا ئیندیپێندنت، دەربارێ ئالۆزییا ل ئوکراینا و دانوستاندنێن ناڤبەرا ئیران و ئه‌مەریکایێ دا بال کشاند سەر ڤێ مژارێ و گۆت: «هێڤیدارم د دەمەکێ نێزیک دا باندۆرەکا نەرێنی ل سەر دانوستاندنان چێنه‌بیت، لێ ئەز دزانم زلهێزێن جیهانێ بۆ وەلاتێن ناڤچەیێ نەخشەیەکێ هۆڤانە ئامادە کرنە، دخوازن سعوودیێ بکن چار پەرچە، ترکیێ بکن سێ پەرچە و ئیرانێ ژی بکن شەش پەرچە».
ل گۆر ئەحمەدی نەژاد، «دخوازن وەلاتێن ناڤچەیێ بەلاڤ بکن و بکن وەلاتێن بچووکێن لاواز، ئەڤه نەخشەرێیا وانە، تاکە رێیا کو مە ژ ڤێ نەخشەیێ رزگار دكه‌ت، یەکیتیا ناڤبەرا وەلاتێن ناڤچەیێ یە».
ئەحمەدی نەژاد هەروه‌ها راگهاند کو ئیرۆ ناڤچە د ناڤ شەر و مەرجەکی گەلەک دژوار دا یە و گۆت: «تەحەمولکرنا وێ گەلەک زەحمەتە، بۆ پێشخستنا ئاشتی و ئەولەهیێ د ناڤبەرا وەلاتێن ناڤچەیێ دا پێویستی ب هەماهەنگیەکا بەرفرەهـ یا ناڤبەرا گەلێن ناڤچەیێ هەیە».
