ھێزەکا رەژیما سووریێ ژ بۆ شەرێ ل دژی ئوکراینا گەھەشتە رووسیایێ

ھێزەکا ئارتێشا رەژیما سووریێ ژ بۆ ھەڤکاریا ل گەل ئارتێشا رووسیایێ یا ل دژی ئوکراینا گەھەشتە رووسیایێ.

رۆژنامەیا «نەیو یۆرک تایمس» یا ئامەریکایێ ب زمانێ دیپلۆماتەکی ڤە راگەھاند، ئەو ھێز ژ 100 لەشکەرێن ئارتێشا رەژیما سووریێ پێک دهێت، کو بەرێ ل سووریێ ل گەل ھێزێن رووسیایێ کار کرنە.

ئەو ھێزا رەژیما سووریێ یا گەھەشتیە رووسیایێ، پشتی وەرگرتنا پەروەردەیا تایبەت، ژ بۆ شەرێ ل دژی ئارتێشا ئوکراینایێ دێ ژ بۆ ئوکراینا هێنە شاندن.

ل گۆر ھەمان رۆژنامەیێ راگەھاندیە، ب ھەزاران لەشکەرێن رەژیما سووریێ ئامادەبوونا خوە راگەھاندنە کو بچنە ئوکراینا و شەر د بەرژەوەندیێن ئارتێشا رووسیایێ دا بکەن.

سەرۆکێ رێخستنا سووریا ژ بۆ راستی و دادپەروەریێ «بەسام ئەحمەد» راگەھاندیە: لەشکەرێن رەژیما سووریێ ژ بۆ دو سەدەمان دچن تەنشت ئارتێشا رووسیایێ ل دژی ئوکراینایێ، ئەو سەدەم ژی ئەڤەنە:

– ژ بۆ بەرسڤدانا ئالیکاریێن رووسیایێ یێن ژ بۆ رەژیما سووریێ

– بدەستخستنا پارە

شەرێ رووسیا و ئوکراینایا رۆژا 24/2/2022یێ ب بریارا سەرۆکێ رووسیایێ «ڤلادمیر پوتین» ڤە دەستپێ کر، ھەتا نھا ژی بەردەوامە.

رووسیا ژ مەھا ئیلۆنا 2015ێ ڤە ھێز و ئاموورێن لەشکەری ڤە پشتەڤانیا رەژیما سووریێ دکەت.