سه‌رۆكوه‌زیرێ ئیراقێ مسته‌فا كازمی ئیرۆ سه‌ره‌دانا وه‌زاره‌تا ناڤخوه كر و دیار كر، هێزا كو ته‌ماشه‌ی باره‌گه‌هێ په‌ده‌كێ دكری وه‌ختا كه دهاته سۆتن، دێ لێپرسینێ ل گه‌ل هێته كرن.
مسته‌فا كازمی ئیرۆ رۆژا یه‌كشه‌مبی 3/4/2022ێ سه‌ره‌دانا وه‌زاره‌تا كارێن ناڤخوه كر و ل گه‌ل وه‌زیرێ ناڤخوه و ئه‌فسه‌رێن پایه‌بلند جڤییا، كازمی نرخاندن ژ بۆ مژارا ئه‌وله‌هییا جڤاكی و چاوانییا قاییم كرنا وێ كر.
د مژارا ئێریشا سه‌ر باره‌گه‌ها په‌ده‌كێ، مسته‌فا كازمی گۆت: هێزا كو ل شه‌ڤا سۆتنا باره‌گه‌ها په‌ده‌كێ چ كارڤه‌دان نیشان نه‌دای و ته‌نێ ته‌ماشه‌ی بوویه‌رێ دكری، ئه‌ڤ یێك ژێ ناهێته قه‌بوول كرن و لێپرسین دێ ل گه‌ل هێته كرن.
ل حه‌فتییا رابووری ب سه‌دان ئالیگرێن حه‌شدا شه‌عبی ئێریشا باره‌گه‌ها لقا 5 یا په‌ده‌كێ ل به‌غدایێ كر و سۆت، پاش ده‌رباسبوونا چه‌ند رۆژان، په‌ده‌كێ بریارا هه‌رفاندنا باره‌گه‌ها خوه یا ل به‌غدایێ دا وه‌كه هه‌لوه‌سته‌كه نه‌رازیبوونێ ژبه‌ركو حكوومه‌تا به‌غدایێ نه‌شێت ئه‌وله‌هیێ ژ بۆی دابین بكه‌ت كو ئه‌و جارا دویه‌مین بوو دهێته سۆتن.
