پاسدارێن ئیرانێ د سێ رۆژێن بۆری دا نێزیکی 9 کۆلبەرێن خەلکێ باژارێن سەر ب پارێزگەھێن سنە، کرماشان و ناڤچەیێن سینۆری یێن رۆژھلاتێ کوردستانێ بریندار کرینە.
راپۆرتا تۆرا مافێن مرۆڤان یا کوردستانێ دیار دکەت، د چار رۆژێن دەرباسبوویی دا 6 کۆلبەر ھاتینە بریندارکرن، لێ رێخستنا «ھەنگاو» یا مافێن مرۆڤا بەلاڤ کریە کو د رۆژێن سێشەم، چارشەم و پێنجشەمێ یێن ھەفتەیا بۆری دا، 8 کۆلبەر ھاتینە بریندارکرن.
ھەروھا ل گۆر راپۆرتا «ھەنگاو»ێ، د رۆژێن داوی یێن ھەفتەیا بۆری دا دو کۆلبەرێن خەلکێ «جوانرۆ» ب ناڤێن «نەبی ئەسەدی و یەحیا رووستەمزادە» ل ناڤچەیا سینۆری یا «نەوسود» ھاتنە بریندارکرن. تۆرا مافێن مرۆڤان یا کوردستانێ ژی بەلاڤ کریە کو رۆژا سێشەمبا بۆری، کۆمەکا کۆلبەران ل ناڤچەیا «نەوسود» ھاتنە ئارمانجگرتن و سێ کۆلبەر ب ناڤێن «ئارمان مستەفازادە، سەلام عەزەمی و فەرزاد ئیمامی» ھاتینە بریندارکرن کو ھەموو خەلکێ «پاوە» بوونە.
ھات دەستنیشانکرن، سەرێ سبەھا ھەمان رۆژێ کۆلبەرەکێ دن ب ناڤێ «فەریاد ئەداک» یێ خەلکێ گوندێ «ژیوار» سەر ب باژارێ «سەولاوا» بریندار بوویە. رۆژا چارشەمبێ، دو کۆلبەرێن دن ب ناڤێن «یەحیا روستەمزادە» خەلکێ «جوانرۆ» و «محەمەد مەولودی» خەلکێ «بانە» ل ناڤچەیێن سینۆری یێن «نەوسود و ھەنگەژالی» یێن بانە ھاتینە بریندارکرن.
