هه‌موه‌ختا ده‌ستپێكرنا ئۆپه‌راسیۆنا «په‌نجه-كلیل» یا ئارتێشتا ترك یا داگیركه‌ر ل دژی په‌كه‌كێ ل هه‌رێما كوردستانێ، ئارتێشا ئیراقێ ژی ئێریشێن ل سه‌ر په‌كه‌كێ ل شه‌نگالێ ده‌ست پێ كرن، هه‌ڤسه‌نگییا هێزێ ل شه‌نگالێ نه‌مایه د ده‌ستێ په‌كه‌كێ ده و ئارتێشا ئیراقێ رژده ڤێ جارێ ب رێیا بێباندۆركرنا په‌كه‌كێ و ملیشیا و چه‌كدارێن وێ ل شه‌نگالێ، سینۆره‌كی ژ بۆی ئێریشێن تركیێ بدانیت.
چاڤكانیێن پێگه‌ها «داركا مازی» ل باشوورێ كوردستانێ ئاگاهیێن هه‌ری تایبه‌ت ل ده‌ربارێ ئالۆزیێن شه‌نگالێ یێن دو رۆژێن رابووری كو ل نێڤبه‌را ئارتێشا ئیراقێ و په‌كه‌كێ چێبوونه ب ده‌ست خستن، ئه‌مێ د ڤێ راپۆرێ ده ڤان هه‌موو په‌ڤچوونان ئێخن به‌ر چاڤێن وه.
كێ فه‌رمان دا ئارتێشا ئیراقێ ئێریشا په‌كه‌كێ بكه؟
ئه‌نجوومه‌نا ئه‌وله‌هییا نشتیمانییا یا ئیراقێ، ل هه‌فته‌یا رابووری ب سه‌رۆكتییا مسته‌فا كازمی جڤییا، كازمی فه‌رمانا راسته راست دا ئارتێشێ و هێزێن ئه‌وله‌هیێ كو دۆسیایا ئه‌وله‌هیێ یا شه‌نگالێ بگرن ده‌ستێ خوه و هه‌ر رێیه‌كه هه‌به ژ بۆی رامالیانا ناڤچه‌یێ ژ میلیشیاییان ب كار بینن.
په‌ڤچوونان ب ئێریشا ل سه‌ر ئاساییشا ئێزیدخانێ ده‌ستپێكر
رۆژا دوشەمێ 18/4/2022ێ دەمژمێر 09:50ێ شەڤێ، ل گۆری زانیاریێن پشتراستکری، ئارتێشا ئیراقێ ل ناڤ ناڤچەیا شنگالێ گوللـە بەردان هێزێن ئاساییشا ئیزیدخانێ و چەکدارێن ئاساییشا ئیزدیخانێ ژ خالا خوە یا ل ناڤچەیا شنگالێ رەڤیان.
ل هه‌مان رۆژێ شەر و پەڤچوون د ناڤبەرا هێزێن ئارتێشا ئیراقێ و ئاساییشا ئێزیدخانێ دە دەرکەت و د ئەنجامێ دە 2 وەلاتیێن سڤیل بریندار بوون، ل گۆری ئاگاهییان کو لەشکەرەکی ئیراقی د وێ په‌ڤچوونێ ده بریندار بوویە.
ئەڤ شەر و پەڤچوون رۆژا دوشەمێ 18ێ نیسانێ دانێ ئێڤارێ، ل دەرگەهێ دوگۆری ل ناڤچەیا سنوونی یا سەر ب قەزا شنگالێ ده‌ركه‌ت، پشتی کو ئەندامێن ئارتێشا ئیراقێ نێزی خالەکە لەشکەری یا ئاسایشا ئێزیدخانێ بوون و داخوازا “ڤالاکرنا قەرەقۆلا لەشکەری” كر كو دكه‌ڤه ده‌رگه‌هێ دوگۆری، لێ به‌لێ ل ده‌ستپێكێ هێزێن ئێزیدخانێ ئه‌و داخوازا ئارتێشێ ره‌د كر و د ئەنجامێ دە پەڤچوونێن چەکداری دەرکەتن.
