ل ھەمبەر ئۆتۆبووسا ڤەگوھەستنا کارمەندێن گرتیگەھێ ئێریشەک بۆمبەیی پێکھات

ل باژارێ بورسا یێ ترکیایێ د ئۆتۆبوسەکا ڤەگوھەستنا پاسەوانێن گرتیگەھێ دا تەقینەکێ روو دا و کەسەک ھات کوشتن و 7 کەس ژی بریندار بوون. پارێزگارێ بورسایێ «یەعقووب جانبۆلات» گۆت؛ ل گۆری ئاگاھیێن دەستپێکێ ئەڤە ئێرشەکە تەرۆریستییە.

ل باژارێ بورسایێ ل تاخا یەنی کارامانێ د دەمژمێر 7:40ێ دا د ئۆتۆبووسەکا ڤەگوھەستنا پاسەوانێن گرتیگەھێ دا تەقینەک پێکھات.

ل گۆری زانیاریێن دەستپێکێ د تەقینێ دا کەسەک ھات کوشتن و 7 کەس ژی بریندار بوون. رەوشا 2 برینداران گرانە.

پشتی تەقینێ گەلەک ئامبولانس و تیمێن ھاوارچوونێ ژ بۆ جھێ بوویەرێ ھاتن شاندن و بریندار راکرن نەخوەشخانەیان.

پارێزگارێ بورسایێ وھا ئاخڤی: “تەقەمەنی ل سەر رێیا ئۆتۆبووسێ ل بنێ دارەکێ ھاتبوو دانین، ل گۆری نرخاندنا مە جوورەیێ تەقەمەنیێ یا کو ب دەستان ھاتیە چێکرنە و د دەما دەرباسبوونا ئۆتۆبووسێ دا ژ دوور ڤە ھاتیە تەقاندن. پاسەوانەکێ گرتیگەھێ جانێ خوە ژ دەست دا. د ئۆتۆبوسێ دا نێزیکی 30 کەسان ھەبوون. وەزیرێ کارێن ناڤخوەیی و وەزیرێ دادێ دێ هێنە بورسایێ. ل گۆری نرخاندنا مە ئەڤە ئێرشەکا تەرۆریستییە.”