بەردەڤکێ وەزارەتا بەرەڤانییا ئامەریکایێ (پەنتاگۆن) جۆن کربی راگھاند، ئارتێشا وەلاتێ وی ل ئالمانیایێ پەروەردەیا چاوانیا بکارئانینا رادار و تۆپاڤێژ و چەند پەروەردەیێن دن ددەنە سەربازێن ئوکراینایێ.
جۆن کربی د جڤینا چاپەمەنیێ یا رۆژانە دا راگھاند: “ئیرۆ پەروەردەکرنا سەربازێن ئوکراینایێ ژ ئالیێ ئامەریکایێ ڤە، ل ئالمانیایێ دەست پێ کر.”
کربی دیار کر کو ئەڤ پەروەردە د دەمەکێ دا نە کو شەر ل ھەرێما «دۆنباس» یا ئوکراینایێ زێدە بوویە و دەمەکە کورتە کو ئامەریکایێ سیستەما رادار و تۆپاڤێژ بۆ ئوکراینایێ دابین کرنە. جۆن کربی ئاشکەرا کر: “ئەڤ سیستەم دێ ببن سەدەما بھێزبوونا خوەراگریا ل رۆژھلاتێ ئوکراینایێ ل دژی رووسیایێ.”
بەردەڤکێ وەزارەتا بەرەڤانییا ئامەریکایێ (پەنتاگۆن) دا زانین، پەروەردە و راھێنان ب ھەڤاھەنگیا ئالمانیا و فەرمانداریا ناڤەندییا ھێزێن ئامەریکایێ، ل ئەفریقا و ئەورۆپایێ برێڤە دچن. گرووپەکا سەربازی یا ئامەریکی کو ژ 160 سەربازان پێک دهێت و بەریا دەستپێکرنا شەری ژ ئوکراینایێ ڤەکشیابوون، سەرپەرشتیا پەروەردەیێ دکن.
