نەتەوێن یەکگرتی راگهاند، سالا بۆری زێدەتری 3 هەزار کەسان جانێ خوە ژ دەست دانە ئان ژی وندا بوونە دەما کو هەول ددان کو دەریایا سپی و ئاتلانتیک دەرباس بکن و خوە بگهینن ئەورۆپایێ.
راپۆرا نوو یا كۆمسیۆنا په‌نابه‌ران یا نه‌ته‌وه‌یێن یه‌كگرتی بانگا تەڤگەرەکە لەزگین کر دا کو پێشی ل مرنا زێدە یا پەنابەر و کۆچبەران بگرە یێن کو دخوازن خوە بگهینن ئەورۆپایێ.
د راپۆرێ دە هات دیارکرن، 3077 کەس دەما کو هەول ددان دەریایا سپی و ئاتلانتیکێ دەرباس بکن و خوە بگهینن پارزەمینێ، وندا بوونە.
بەردەڤکا كۆمسیۆنا په‌نابه‌ران شابا مانتۆئۆ ل جنێڤێ ژ رۆژنامەڤانان رە گۆت، «مخابن ژ دەستپێکا ڤێ سالێ ڤە، 478 کەسێن دن ل دەریایێ ژیانا خوە ژ دەست دانە یان ژی وندا بوونە».
راپۆرێ دەستنیشان کر کو ژ بۆ سالا 2021ێ، 1924 کەس ل دەریایا سپی ژیانا خوە ژ دەست دانە یان وندا بوونە، د هەمان دەمێ دە 1153 کەسێن دن ژی دەما بەر ب گراڤێن کاناریا ڤە دچوون، ژیانا خوە ژ دەست دانە یان ژی وندا بوونە.
مانتۆو بانگا نه‌ته‌وێن یه‌كگرتی کر کو پشتگرییێ بکە، دا کو ژ ڤان رێویتیێن خەتەرناک رە ئالتەرناتیفێن گونجاو بێنە پەیداکرن و رێ ل بەر کەسێن کو ببن قوربانیێن قاچاخچیتیێ بێنە گرتن.
