پاسه‌وانێن سنۆری یێن ئیراقێ خالەکا دی یا سەربازی ل سنۆرێ گوندێ ھرۆرێ یێ سەر ب کانی ماسێ زێدە دکه‌ن، ئەڤه ژی ژ بۆ توندکرنا سنۆران و دوورئێخستنا په‌كه‌كێ ژ دەڤەرێن سنۆری و رێگریکرن ل پێشڤەهاتنا زێدەتر یا ئارتێشا ترکیێ هاتییه.
ل گۆری ئاگاهیێن پێگه‌ها «داركا مازی»، ئیرۆ رۆژا شەمبیێ 14 گولانا 2022ێ، ھێزێن پاسەوانییا سنۆری یا ئیراقێ ل ناحیا کانی ماسێ یا سەر ب ئامێدیێ ڤه، ل نێزیکی گوندێ ھرۆرێ یێ دەڤەرا بەرواری بالا، خالەکا دی یا سەربازی زێدە کرن.
ل گۆر ئاگاهییان ئەڤ خالا سەربازی یا کو ھێزێن پاسه‌وانێن سنۆر لێ دهێنه بجھکرن دێ یا ھەردەمی بیت و ڤی جهی جارەکا دی ڤالا ناکه‌ن.
ب دانانا ڤێ خالا سەربازی، ھەژمارا بنکە و بارەگەھێن پاسه‌وانێن سنۆری یێن ئیراقێ ل دەڤەرا بەرواری بالا و سندی، بوونە 30 خالێن سەربازی کو پرانییا وان پشتی دەستڤەبەردانا ناڤچەیێن سنۆری ژ ئالیێ پەکەکێ بۆ دەولەتا ترکیێ، هاتنە دانین.
مەبەستا دانانا ڤان خالان، رێگرتن و دوورئێخستنا چەکدارێن په‌كه‌كێ یه کو به‌هانه‌یان دده‌نه دەستێ ھێزێن ترکیێ و ھێزێن وێ كێشی ناڤ سنۆرێ ھەرێما کوردستانێ و ئیراقێ دكه‌ن.
ل گۆری ئاگاهیێن تایبەت یێن ب دەست پێگەها «دارکا مازی» کەتین، د قوناغا پێش مه دا، هەگەر پاسەوانێن سنۆری یان پێشمەرگە بارەگەهەکێ خوه ل ناڤچه‌یا «گانمیرکێ» ژی نەدانن، دێ پەکەکە و ترکیە شەرێ خوە یێ سەختە ئینن وێ ده‌ڤه‌رێ یا كو ب رێیا کەڤن یا د نێڤبەرا کانی ماسێ و ئامێدیێ دا دهێته ناس كرن.
