نووری چەلک
ئەڤە دەمەک درێژە کو پەیامێن نە د خێرا کوردان دا دهێنە دان و مەسەلا ئێریشێن ترکیێ یێن سەر باشوور دا رۆژەڤا کوردان سەرووبن کر، خویا بوو کو دێ ھندەک کریارێن تاری و ئاژاوەگێریێن نە د بەرژەوەندییا کوردان دا هێن کرن.
ژ خوە ھەرتم وسا بوویە. هەر جارا کو کورد پیچەکێ دکەڤنە ئارامیێ و دەستکەفتنێن ناڤدەولەتی ب دەست دخوەن، ھەو وە دیت کو ژ ھەردو ئالییان ڤە (باسکەک ژ دەولەتێن داگیرکەر و باسکەک ژ پەکەکێ) و ڤان داوییان هەڤپشکا حکوومەتێ «یەنەکە» ژی ژ ھەمان دەریایێ مفا وەردگرە؛ ژ بۆ تێکدانا کوردستانا ئازاد دەک و دۆلاب ب دەستێ پەکەکێ، و مقاولێن ئیران و سوریێ یەنەکێ ڤە ھاتن گەراندن، مژ و دوومان ب سەر رۆژەڤێ کەت و ئاژاوەگێریان دەست پێ کر.
کریار و ئالۆزییێن کو چ پەیوەندی ب پەدەکێ ڤە نەبوونە و نینە، بوونە سەدەم کو کورد دیسا د قادا ناڤنەتەوی دا بکەڤنە دەڤێ خێرنەخوازان و پێڤاژۆیا کو ژ بۆ خێرا کوردان نەرم بووبوو، بهێتە ئالۆزکرن.
ئەز باوەر ناکم کو هیچ کەسەکە گومان ژێ بکە کو، ئەڤ پرۆپاگاندایێن خەرابکار ژ لایێ پەکەکێ ڤە ب قەست و دژمناتیێ تێن کرن.
ژ سەرۆکێ کوردستانێ بگرە، سەرۆکوەزیر و پرانیا دام و دەزگەھان، ھەتا ب رەوشەنبیر و نڤیسکارێن کورد، د دەربارێ ئالیکاریا رۆژئاڤایێ کوردستانێ دا چ تەخسیر نەھات کرن. لێ ھەزار مخابن پەکەکەیا کو چ دەمان خوە ژ پەیوەندیێن لگەل داگرکەرێن کوردستانێ دا ئازاد نەکری، نەھات رازیکرن.
کریارێن قرێژیێن پەکەکێ و ئالیگرێن وێ ئاشکەرا بوونە، گرێدانا پەکەکێ، پەیەدێ ب رەژێما سووریێ، ئیران و ترکیێ دەردکەڤن ھۆلێ ژی، تێ فێھمکرن کو مەسەلە نە مەسەلەیا پەیوەندیێن باشوور لگەل ترکیێ دا یە، مەسەلە ژناڤبرنا دەستکەفتیێن باشوورێ کوردستانێیە.
پەکەکە ب مەشا نەتەو-دەولەتبوونا باشوور ھار بوویە و بەردەوام د مەدیایا خوە دا دەرەوان ل دژی پەدەکێ بەلاڤ دکە.
پرانیا کورد و کوردستانیێن ئاشتیخواز د ناڤا وێ ترسێ دا بوون کو پەکەکە تەحەموولا پر رەنگی و پردەنگیێ نەکە، پێڤاژۆیێ پووچ بکە.
پرانیا کوردان ھێڤی دکن کو پەکەکە دەست ژ ڤان کریارێن قرێژی بەردە. مقاولیا رەژێمێن داگرکەر نەگریتە سەر ملێ خوە و روونی ل سەر نانێ دەولەتێن داگرکەر نەکە.
لێ چ چێبوو پشتی بندەستخستنا ئەنجامێن ریفراندۆما سەرخوەبوونێ.
پشتی وێ رۆژێ پەکەکێ تێکبرنا کوردستانا ئازاد گرتە سەر خوە، کورد و ئاشتیخوازێن ھەرێمێ خەیالشکەستی کرن، دربەک مەزن ل کوردان و کوردستانیان دا و دیسا بەرژەوەندییێن گەلێ کورد و کوردستانێ کرنە قوربانا بەرژەوەندییێن خوە و ئەفەندیێن خوە.
تشتەکی بالکێش ژی ئەڤە کو، د ڤان دەمێن داوی دا پەکەکە و یەنەکە ب پلان و پرۆژە دژمناتیا پەدەکێ دکن. پارتیا پەکەکێ یا باشوورێ کوردستانێ داخویانیا کو د ھلبژارتنێن ئیراقێ دا پشتگریا یەنەکێ بکە دا؛ یەنەکێ، پەیەدە ل سلێمانیێ مەعزووم کر و داخویانیێن ھەڤبەش دان. گەلۆ ما ئەڤە هەموو لھەڤراستھاتن و ژ نیشکەکێڤەنە نزانم، لێ دیارە کو بریار ژ یەک ناڤەندێ دەردکەڤە، دەرکەتیە.
ب کورت و کورمانجی؛ پەکەکێ و ئالیگرێن وێ گەلەک ئاشکەرا رێ ل بەر پارتیێن کو نە ئاپۆچی نە گرت و ھەفسارێ خوە ژی ب دەستێ رەژێمێن داگرکەر ڤە بەردا.
پەکەکە ب ڤان تێکلی و کریارێن خوەیێن قرێژی، بێی کو پێویستییا کارێن خوەیێن ھەڤبەش لگەل داگرکەران دا ڤەشێرە دەست د دەست دا، تی ئێنتیێ تێخیت بن دەولەتبوونا کوردستانێ و رێدانا چارەسەرییا پرسگرێکا کورد ل ترکیێ.
ژ بەر کو ئیرۆ پرسگرێکا ترکیێ یا ھەری مەزن پرسگرێکا چارەسەریا مافێ کوردستانێیە.
لێ؛ ئەڤ پرسگرێکا مەزنا کوردستانێ ژ بۆ پەکەکێ نە پرسگرێکا بنگەھییە. خەلەتییا بنگەھین یا ناڤبەرا کوردان ئەڤە کو ئەم پرسگرێکا بنگەھین و پرسگرێکا پەکەکێ تێکەلی یەک دکن.
ژ بەر کو ئەرکا کوردستانیان پاراستنا دەستکەفتیێن کوردستانێیە، لێ ئەرکا پەکەکەئییان تێکبرنا هەموو دەسکەفتیێن نە د کۆنترۆلا وێ دا نە.
ئەڤجا گاڤا ئەم ژ ئالیێ کوردستانیان ڤە ل بوویەرێ بنێرن، پرسگرێکا کوردستانیان پرسگرێکەک نەتەوییە؛ کو، پیدڤییە ب دەولەتبوونێ بهێت چارەسەرکرن.
