کۆمپانیا راپرسیێ یا «یۆنەیلەمێ»، راپرسیا خوەیا گولانا 2022یێ ئاشکەرا کر. راپرسیا کو ل باژارێن باکورێ کوردستانێ و ترکیایێ ھاتیە کرن، نیشان ددە کو دەنگێن ھەڤپەیمانیا ملەت، ژ دەنگێن هەڤپەیمانیا جمھورێ زێدەتر بوونە.
کۆمپانیا «یۆنەیلەمێ»، راپرسیا مەھا گولانێ، ل 27 باژارێن باکور و ترکیایێ ئەنجامدا و پرسێن خوە ژ 2 ھەزار و 400 کەسان پرسین. «یۆنەیلەمێ » ئاشکەرا کر کو دەنگێن ئاک پارتیێ، ل گۆری چلەیا 2021ێ، 5 پلەیان کێم بوونە و دەنگێن جەهەپێ ژی 3.5 پلەیان زێدە بوونە.
ژ بەشداران ھاتیە پرسین؛ “ھەگەر نھا ھلبژارتن بهێنە ئەنجامدان، ھوونێ دەنگێن خوە بدن کێ؟”
ل گۆری ئەنجامان؛ ژ 37.5%ێ بەشداران گۆتنە ھەڤپەیمانیا ملەت، ژ %33.5 ژی گۆتنە هەڤپەیمانیا جمھوری. ب ڤی ئاوایی ھەڤپەیمانیا ملەتێ، ب 4 خالان ل پێشیا هەڤپەیمانیا جمھورێ خویا دکە. ل گۆری ئەنجامێن راپرسیێ، ژ %57.5ێ خەلکێ دبێژە؛ “ترکیە باش نایێ رێڤەبرن، ژ %20ێ خەلکێ ژی دبێژە؛ رێڤەبرن نھا، نە باشە نە ژی خرابە.” ژ %21.2 خەلکێ ژی دبێژە کو “ترکیە باش تێ رێڤەبرن.”
ژ بەشداران ھاتیە پرسین؛ “ئەگەر ئیرۆ ھلبژارتن بێ کرن، گەلۆ ھوونێ دەنگێن خوە بدن سەرۆکۆمارێ ترکیەیێ رەجەب تەیب ئەردۆگان؟”
ئەنجامێن راپرسیێ نیشان ددن کو ژ %54ێ بەشداران گۆتنە “ناخێر” ژ %30.9ێ بەشداران ژی گۆتنە “بەلێ”، ھات راگھاندن کو ژ %59.8ێ خەلکێ دخوازە سیستەمێ رێڤەبەرنا ترکیایێ وەکی بەرێ ببە سیستەمێ پارلامەنتەریێ و ژ %30.9ێ بەشداران ژی پشتگریا سیستەمێ ھەیی کریە.
