فینلاندا و سوێدێ ئیرۆ چارشەمبێ ل بارەگەها رێخستنا پەیمانا ئاتلانتیکا باکور (ناتۆ) ب ئاوایەکی فەرمی ئه‌ندامبوونا خوە ژ بۆ رێخستنێ پێشکێش کرن، ب ڤێ یەکێ ژی پرۆسەیا ئەندامبوونێ دەست پێ دکەت کو تێ چاڤەرێکرن تەنێ چەند حه‌فتییان ڤه‌كێشیت.
فینلاندا و سوێدێ داخوازا ئه‌ندامبوونا ناتۆیێ ئیرۆ 18/5/ 2022 ب ئاوایەکی فەرمی پێشکێش کرن، پشتی کو ئۆپەراسیۆنێن لەشکەری یێن رووسیایێ ل ئوکراینایێ بوون سەدەما گوهەرتنەکا مەزن د بێئالیبوونا لەشکەری یا ب دەهان سالان یا وان هەردو وەلاتان دا.
سكرتێرێ گشتی یێ ناتۆیێ یێنس ستۆلتێنبێرگ پشتی کو داخوازنامە ژ بالیۆزێن فینلاندا و سوێدێ ل بارەگەها ناتۆیێ وەرگرتن، ئەڤ یەک ب گاڤەکا دیرۆکی ب ناڤ کر.
ستۆلتێنبێرگ بۆ رۆژنامەڤانان گۆت: «ئەز ب دلگەرمی پێشوازیێ ل داخوازێن فینلاندا و سوێدێ یێن ژ بۆ ئەندامبوونا ناتۆیێ دکه‌م».
تێ چاڤه‌رێكرن کو پێڤاژۆیا ئەندامەتییا هەردو وەلاتان دو حه‌فتییان به‌رده‌وام بیت، هه‌ر چه‌ند کو سەرۆککۆمارێ ترکیێ رەجەپ تاییب ئەردۆگان نەرازیبوونا خوە ل سەر ئەندامبوونا وان وه‌لاتان نیشان دابوو.
ئەگەر نەرازیبوونێن سەرۆکۆمارێ ترکیێ هاتن چارەسەرکرن و گۆتووبێژێن ئەندامه‌تیێ ل گۆرا کو تێ پێشبینیکرن برێڤه بچن، هەر دو وەلات دکارن د ناڤ چەند مەهان دە هەتا نێزیکی سالەکێ ببن ئەندامێن ناتۆیێ.
پێڤاژۆ ب گشتی ژ 8 هەتا 12 مەهان دەوام دكه‌ت، لێ ناتۆ ژ بەر خەتەرەیا کو رووسیا بۆ هەردو وەلاتان چێدکەت، دخوازیت بلەز تەڤبگەریت.
زێده‌باری ڤێ گاڤا وان هەردو وەلاتان، سەرۆکاتیا رووسیایێ «کرێملنێ» رۆژا دوشەمبییا بۆری گۆتبوو، بریارا فینلاندا و سوێدێ ژ بۆ ئه‌ندامبوونا ناتۆیێ دێ خه‌ته‌ریێ ل سه‌ر ئێمناهییا ئه‌ورۆپایێ چێكه‌ت.
