پشتی 5 سالان ژ بداویهاتنا ئۆپەراسیۆنێن ل دژی داعشێ، زێدەتری 193،000 روونشتڤانێن شەنگالێ كو پرانی ژێ ئێزدی نه، هێژان ڤەنەگەریانە وارێن خوە.
د دەستپێکا گولانێ دا و ب سه‌ده‌ما ئالۆزییا ئەولەکاری و پەڤچوونێن د ناڤبەرا ئارتێش و چه‌كدارێن په‌كه‌كێ دا ل شه‌نگالێ ده‌ركه‌تی، نێزیکی 10،000 خێزانان نەچار مان کو جارەکا دی برەڤن.
ل گۆری راپۆرته‌كا نه‌رویجی كو ئاژانسا AFPیێ به‌لاڤ كرییه، “ژ بلی ئالۆزبوونا بەردەوام د ناڤبەرا کۆمێن چەکدار دا، کێشەیێن وێرانیێ و نه‌بوونا ئاڤه‌دانیێ یا ب سه‌ده‌ما كۆمێن چه‌كدار دا ل شه‌نگالێ هه‌یه، له‌وما چ كه‌س نه‌شێن ڤه‌گه‌رن”.
هه‌روه‌ها ده‌ست نیشان كر، زێده‌باری پرسگرێكێن ئه‌وله‌هیێ، پرسگرێكێن زه‌ڤی و ملكیه‌تێ ژی هه‌نه.
راپۆرتێ زێدە کر کو “نێزیکی 64% ژ کەسێن كۆچبه‌ر كو پرس ژێ هاتنه كرن، گۆتن کو مالێن وان ب توندی زرار دیتنە”.
راپۆرتێ ئاماژە ب وێ یەکێ ژی کر کو ئاوارە تەکەز دکه‌ن کو “وان ژێده‌رێن پێویست نینن ژ بۆ نووئاڤاکرنا مالێن خوە، نەمازە ژ بەر نەبوونا دەرفەتێن کار و دەرەنگخستنا حکوومەتێ د دانا قەرەبووکرنێ دا”.
راپۆرتێ گۆت کو “99% ژ وان کەسێن کو ژ بۆ وه‌رگرتنا قه‌ربووكرنێ داخوازی داینه حكوومه‌تا فه‌ده‌رال، قه‌ره‌بوو وه‌رنه‌گرتنه”.
د دەستپێکا گولانێ دا، شنگال بوو شاهدێ شەر و پەڤچوونێن توند د ناڤبەرا ئارتێشا ئیراقێ و یەکینەیێن پاراستنا شنگالێ یێن گرێدای په‌كه‌كێ، ژ به‌ر ڤێ سه‌ده‌مێ نێزیكی 10 هه‌زار مالباتان جاره‌كا دی نه‌چار مان ژ شه‌نگالێ و ده‌ردوورا وێ كۆچبه‌ر ببن.
حكوومه‌تا ئیراقێ و حكوومه‌تا باشوورێ كوردستانێ ل ئۆكتۆبه‌را سالا رابووری په‌یمانه‌ك ژ بۆی ئاساییكرنا ره‌وشا شه‌نگالێ و ڤه‌گه‌را كۆچبه‌ران ئیمزا كربوو، لێ به‌لێ په‌كه‌كه ژ وێ ده‌مێ ڤه ئاسته‌نگییان ژ بۆی جی ب جیكرنا په‌یمانێ چێدكه‌ت و رێ ناده‌ت ئاواره ڤه‌گه‌رن وارێ خوه.
