چاڤکانیەکێ ئاگاھدار ئاشکەرا کر، رۆژا یەکشەمبێ شاندەیەکێ پەکەکێ ل شاما پایتەختا سووریێ ل گەل بەرپرسێن ئیستخباراتا رەژیما سووریێ جڤیا و جڤینێن وان ژی دەربارێ رەوشا ناڤچەیێن بن دەستھلاتا پەکەکێ و ھەبوونا رەژیمێ یا ل رۆژئاڤایێ کوردستانێ دا بوویە.
چاڤکانیا ئاگاھدار کو نێزیکی پارتیا یەکتیا دەمۆکراتیک (پەیەد)ێ بوو ژ بۆ باس نیوسێ دیار کریە: “ڤێ داویێ شاندەیەکێ پەکەکێ ب سەرۆکاتیا سەبری ئۆک سەردانا شامێ کر و ل گەل بەرپرسێ پایەبلندێ ئەولەھیا ئیستخباراتا رەژیما سووریێ «عەلی مەملووک» جڤیایە و ل سەر رەوشا ناڤچەیێن بن دەستھلاتا پەکەکێ و رەژیما سووریێ یێن ل رۆژئاڤایێ کوردستان و حەلەبێ گۆتووبێژ کرنە.”
ھەروھا گۆت: “ھەردو ئالی رێکەفتنە کو رەوشا ناڤچەیێن بن دەستھلاتا وان دا ئارام بکن و ل گۆر رێکەفتنا بەرێ یا د ناڤبەرا وان دا کار ل گەل ھەڤ بکن.”
د ڤێ دەربارێ دا چالاکڤانێ مافناس مەحموود عەلۆ ژ بۆ باس نیوسێ داخویانی دا و راگهاند: “پەکەکە، ژ بۆ یەک خولەک ژی پێوەندیێن ل گەل ئیستخباراتا سووریێ قوت ناکە.” و گۆت: “گەلەک رێکەفتن دەربارێ وان ناڤچەیان کرنە و ژ بۆ قەوتاندنا چالاکڤانێن کوردێن نەیارێ رەژیمێ رێکەفتنا وان ھەیە.”
ھەروھا دبێژە: “پەکەکە ل گۆر رێکەفتنا ل گەل سووریێ، دەم دەما چالاکڤانێن کوردێن ئۆپۆزیسیۆنا سووریێ رادەستی رەژیمێ دکە، گەلەک نموونە ژی ھەنە، ناڤ وان دا ژی رێڤەبەرێ پەدەکە-سێ «عەبدولرەحمان ئاپۆ»یە کو رادەستی رەژیمێ کرن.”
عەلۆ گۆت: “د نێڤبەرا پەکەکێ و رەژیما سووریێ دا پێوەندیێن بازرگانی و پیشەسازی ژی ھەنە، دایینا سۆتەمەنی ب ئیدارەیا خوەسەر و ھەروھا چەکدارێن سەر ب ئەنقەرە ب رێیا بازرگان و قاچاخچیان ڤە وان کاران دکن.”
وی چالاکڤانی گۆت، پەکەکە مریێ پارە و دەولەمەندیێ یە. ئەو ژی د بەرژەوەندیا رێڤەبەریا قەندیلێ دایە و چ تشتەکێ کو گرێدایی کوردبوونێ ھەبە ئەو تشت ل گەل پەکەکێ نە گرنگە و مژارێن سەرەکی نین.”
