ژوورا پزیشکێن ستەنبۆلێ خەلاتا ئاشتیێ دا مالباتا شەنیاشار

malbata Şenyaşar

خەلاتا دەمۆکراسی، ئاشتی و مافێن مرۆڤی یا کو ھەر سال ژ ئالیێ ژوورا بزیشکێن ستەنبۆلێ ڤە تێ دایین ئیسال ب مالباتا کوردا شەنیاشار ھات دایین.

د 32یەمین مەراسیما خەلاتدایینێ دا کو ل ستەنبۆلێ ل سەر ناڤێ بزیشک «سەڤینچ ئۆزگونەر» ھات سازکرن، ئەمینە شەنیاشار ژ دەستێ «پرۆف. در. شەبنەم کۆرور فینجانج» خەلات وەرگرت.

«ئامینا شەنیاشار» بانگا دادپەروەریێ کر و گۆت: “زلمەکا مەزن ل مە کر، ژ بۆ دادپەروەریێ من سەری ل دادگەھێ دا، من سەری ل گەلەک دەران دا لێ ھەموو دەری ل مە ھاتن گرتن. ئەم ل مالا خوە نکارین بسەکنین. ئەگەر مرن بهێت ژی بلا ل بەر دادگەھێ بهێت. ئێدی ھێز و مەجالێ من نەما. بلا کورێ من بەردن. ل نەخوەشخانەیێ مێر و لاوێ من کوشتن. نەخوەشخانە کرنە جیھێ شەری. خوینا زارۆکێن من ل سەر دەستێ وان کەسانە کو چووبوون نەخوەشخانەیێ. کورێ من نوو زەوجیبوو. ڤێ حکوومەت و دەولەتێ داد و وژدان نینە. ژ بەر کو ل بەر دادگەھێ ئەم نۆبەدێ دگرین ب ئاوایەکێ توند ل مە ددن.”

بوویەرا مالباتا شەنیاشار

ل ناڤچەیا «سرووجا رحایێ» د سالا 2018ێ دا دەما بانگەشەیا ھلبژارتنان پارلامەنتەرێ ئاک پارتی «ئیبراھیم خەلیل یلدز» ل گەل کەسووکارێن خوە سەردانا دکانداران کربوو لگەل ئەندامێن مالباتا «شەنیاشار» دا نیقاشێ دکە و پشترا کەسووکارێن پارلامەنتەری ل گەل مالباتا شەنیاشار پەڤ دچن.

د ئەنجاما پەڤچوونێ دا برایەکێ پارلامەنتەر و ژ مالباتا شەنیاشار ژی 3 کەس تێن کوشتن. ھەتا نھا 4 کەس ھاتنە گرتن.

ژ بەر کو دەربارێ بوویەرێ دا ھندەک گومانبار نەھاتنە گرتن ژ مالباتا شەنیاشار، ئامینا شەنیاشار کو مێرێ وێ و دو کورێن وێ ژ ئالیێ کەسووکارێن پارلامەنتەرێ ئاک پارتی ڤە ھاتنە کوشتن ل بەر دادگەھا «رحایێ» زێدەتری 441 رۆژن نۆبەدا دادێ دگرە دا کو ھەموو گومانبار بهێنە سزادان.

پوستێن ھەمان بەش