وەزارەتا دەرڤە یا ترکیێ راگهاند، شاندەکا هەڤبەشا سوێد و فینلاندایێ سبە دەربارێ هه‌ولێن وان هەردو وه‌لاتان ژ بۆ ئه‌ندامبوونا هەڤپەیمانیا ناتۆیێ دا سەره‌دانا ترکیێ دکەن.
وەزارەتا دەرڤە یا ترکیێ ئیرۆ 24ێ گولانا 2022ێ داخویانیەک بەلاڤ کر و راگهاند، شاندەکا هەڤبەشا هەردو حکوومەتێن سوێد و فینلاندایێ، سەره‌دانا ئەنقەرە یا پایتەختا ترکیێ دکه‌ن و ل گەل بەرپرسێن وەزارەتا دەرڤە یا وی وەلاتی دجڤن و دەربارێ دەستپێکرنا قۆناغا ئەندامبوونا وان هەردو وەلاتان د هەڤپەیمەنیا ناتۆیێ دا گۆتووبێژان دکن.
ل گۆر داخویانیا وەزارەتا دەرڤە یا ترکیێ شاندا هەردو وەلاتان ژ بەرپرسێ ئۆفیسا سەرۆکوەزیرێ سوێدێ ئۆسجار ستەنسترۆم و شێورمەندێ مەزنێ وەزارەتا دەرڤە یا فینلاندایێ ژوککا سالۆڤائارا پێک تێ و ئەو شاند ل گەل بەردەڤکێ سەرۆککۆماریا ترکیێ ئیبراهیم کالن و جیگرێ وەزیرێ دەرڤەیێ ترکیێ سەدات ئۆنال دجڤن.
هەر ئیرۆ وەزیرێ دەرڤەیێ ترکیێ مەولوود چاویشۆگلو کو نها ب سەره‌دانەکا فەرمی ل فلستینێ یە و بریارە سبە ڤەگەرە ترکیێ، د کۆنگرەیەکێ رۆژنامەڤانی دا راگهاند، کو سبە شاندا سوێد و فینلاندایێ دێ سەره‌دانا ئەنقەرە كه‌ن و پێویستە ئەو دو وەلات سۆزنامەیەک نڤیسکی ئیمزا بکن و پێشکێشی ترکیێ بکن کو وان دەست ژ پشتگریکرنا رێخستنێن تەرۆری بەردایە و نیگەرانیێن ترکیێ یێن د ڤی واری دا نەهێلن و ب کریار ژی سۆزا خوە بجهبینن.
