ھەژمارەک ئەندامێن پەکەکێ، ل گەل چەند رۆژنامەڤانەکێن وێ حیزبێ یێن ل سینۆرێ سلێمانیێ، د بن گەفا پەکەکێ دا نە و بەشەک ژ وان رەڤیانە و بەشەک ژ وان ژی دەست ژ کارێ راگەھاندنا پەکەکێ بەردانە.
ل گۆر زانیاران شیرکەتا «چ» کو سەر ب پەکەکێ یە و ژ ئالیێ کەسەکی ڤە تێ برێڤەبرن کو لینکا پێوەندیێن قەندیل و سلێمانیێ یە. ئەو شیرکەت کارێ دابین کرنا چاڤکانیێن دارایی ژ بۆ مالپەر و تەلەڤیزیۆن و رادیۆیێن پەکەکێ ل سلێمانیێ دکە. ھەروھا رێنماییان ددە سازیێن پەکەکێ کو چاوا ئێریش بکن سەر پێکھاتەیا سیاسی یا ھەرێما کوردستانێ و حکوومەتا ھەرێمێ و پەدەکێ. ئەو سازی ژی وھا نە: ستێرک تیڤی. ژن تیڤی. رۆژ نیوس، ئاژانسا فرات نیوس، ھاوار نیوس، رۆناھی تیڤی باسکێ سلێمانیێ، ئاریا تیڤی، گەریلا تیڤی، تەڤدا پرێس و ھەروھا گەلەک سازیێن دن.
د چەند مەھێن بۆری دا 3 رۆژنامەڤانێن وان سازیان دەست ژ کار بەردانە و ل گۆر زانیاران ھەژمارەک دن یا رۆژنامەڤانان ژی دخوازن دەست ژ کار بەردن. سەدەم ژی ژ بەر ترسا چاڤدێری و گەفخوارنێن پەکەکێ یێن ل سەر وانە.
ل گۆر زانیاران بەشەک ژ وان کەسێن کو دەست ژ چاپەمەنیا پەکەکێ بەرددن، گەف ل وان تێ کرن و بەشەک ئەندامێن ناڤ پەکەکێ دا ژی د بن مەترسیێ دا نە. دەرڤەیی وێ ژی د دەمێن بۆری دا ب ھەزاران جوانێن کورد یێن ل گەل پەکەکێ کار کرنە، د چارچۆڤەیا پاقژکرنا ناڤخوەیا پارتیێ دا ھاتنە کوشتن.
ڤێ دەربارێ دا نڤیسکار و خوەدیێ تێزا تایبەت ل سەر فکرا پەکەکێ «حامد گەوھەری» راگەھاند: “ئەز ئاگاھدارم ھەژمارەک کەسێن پەکەکێ ل سلێمانیێ ژ ئالیێ پەکەکێ ڤە د بن مەترسیێ دا نە. پاقژ کرنا ئەندامان پشتی کۆنگرەیا پەکەکێ دەستپێ کر و بەشەک ژ وان کەسێن کو ب ناڤێ شەھید تێن راگەھاندن، و ووسا دیار دکن د شەرێ ل گەل ترکیێ دا ھاتنە کوشتن. د ھەیاما بۆری دا ئەندامەکێ پەکەکێ ل سلێمانیێ برنە و پشترا ژی کوشتنە، بەشەک ژ وان ئەندامێن ل سلێمانیێ ژی دیار نینن، وان دبن قەندیلێ و ل وێ دەرێ تێن کوشتن. ژ بەر وێ ژی ئەز داخوازێ ژ خەلکێ رەوشەنبیرێ سلێمانیێ دکم ئاگاھدارێ ڤێ مەترسیێ بن.”
ھەروھا گۆت: “د دەما بۆری دا ئەندامەکی پەکەکێ یێ ب ناڤێ کانی یلماز ل سلێمانیێ کو جودا ببوو ل گەل عۆسمان ئۆجالان، ب دەستێ پەکەکێ ھات کوشتن. کەسەکی دن ژی نامە ژ بۆ من شاند کو ژ ئالیێ پەکەکێ ڤە ھاتیە گرتن و دبێژە ئەز خستم شکەفتەکێ ل قەندیلێ و 6 مەھان ئەز د وێ شکەفتێ دا ھشتم.”
