فەرماندارێ گشتی یێ هێزێن سووریەیا دەمۆکراتیک، بانگ ل حکوومەتا سووریێ کر کو ل هەمبەر گەفێن ترکیێ، سینۆرێن وەلاتێ خوە بپارێزە. ئاشکەرە کر ژی، رووسیا سۆز دایە کو ئەو قەبوول ناکە هەرێمێن ل سووریێ د بن کۆنترۆلا وێ دەنە راستی ئێرشا ترکیێ بێن.
مازلووم عەبدی د هەڤپەیڤینەکە تەلەڤزیۆنی دە گۆت: «تشتێ کو ژ دەولەتا سووریێ تێ خوەستن ئەوە کو هەلوەستێ نیشان بدە، ژ بەر کو د داویێ دە بەشەک ژ ئاخا سووریێ راستی ئێریشان تێ و تێ داگیرکرن».
فەرماندارێ ههسهدێ ئاشکەرە کر: «پێوەندیێن مە ب سەرکردایەتیا رووسیایێ رە هەنە، ئەو ژی مە پشتراست دکن کو ئەو ئێریشێن ل سەر هەرێمێ قەبوول ناکن».
دەربارێ هەلوەستا ئامەریکا دە ژی عەبدی دەستنیشان کر، ژ بۆ رێ ل بەر ئێریشێن داگیرکەریا ترک وەرە گرتن، پێوەندیێن وان ب رایەدارێن ئامەریکایێ رە بەردەوامن. واشنگتۆن دکارە د دەربارێ ئێریشان دە زەلالتر بە.
فەرماندارێ ههسهدێ هشیاری ل سەر ئەنجامێن ئێرش و ئۆپەراسیۆنا ترکیێ دا و گۆت کو ئەو گەفێن ترکیێ جدی دبینن.
هەر وها د بەردەوامیا ئاخافتنا خوە دە گۆت: «ترکیە ئەڤ 2 سالن کو دخوازە ئێریشان پێک بینە، وەکە کو دەولەتا ترک خەیال دکە نە هێسانە. دێ شەرەکی خورت و دەمدرێژ بە و ئەوێ نکاربن سەرکەتنێ تێ دە ب دەست بخن و ئەگەر ئێریشی هەرێمێن مە بکن ئەمێ هەتا داویێ ل بەر خوە بدن».
عهبدی دیار کر کویێ هەری زێدە سوودێ ژ ئالۆزیا ترکیێ وەردگرە، رێخستنا تەرۆری داعشێ یه، کو دێ کاربە رێزێن خوە ژ نوو ڤە برێخستن بکە.