ئیسرایلێ ئێریشی شامێ کر

ئیسرایلێ شەڤا بۆری ئێریشێن ئاسمانی ل سەر ھندەک خالێن لەشکەری یێن ھێزێن رەژیما سووریێ ل باشوورێ شامێ ئەنجام دان.

ئاژانسا فەرمی یا سووریێ “سانا” ل سەر زارێ ژێدەرەکێ لەشکەری بەلاڤ کر، شەڤا بۆری دەمژمێر 23: 18، ئیسرایلێ ژ ئالیێ «گۆلانێ» ڤە ئێریشەکا ئاسمانی ئەنجامدا و ھندەک خالێن باشوورێ شامێ کرن ئارمانج.

وی ژێدەری گۆت ژی: “سیستەمێن مە یێن بەرەڤانیا ئاسمانی رووبروویی مووشەکێن دژمنان بوون و پرانیا وان خستن خوارێ. د ئێریشێ دا تەنێ زیانێن مادی چێبوو.”

ژ ئالیەکی دن ڤە، رەوانگەھا سووری یا مافێن مرۆڤان راگھاند، ئێریشا ئەسمانی یا ئیسرایلێ ھندەک جھێن لەشکەری ل دەڤەرا «کسوا» ل باشوورێ شامێ ب 10 مووشەکان ئارمانج کرن کو ملیسێن «حزبوللاها لوبنانی» و باتاریایێن بەرەڤانیا ئاسمانی یێن رێژیما سووریێ ل وێ دەڤەرێ ھەنە.

دەستنیشان کر ژی، سیستەما بەرەڤانیا ئاسمانی یا سووریێ ھەری کێم 7 مووشەک خستن خوارێ.

رەوانگەھێ دیار کر ژی، مووشەکەک ل باژارۆکێ «ئەقرەبا» کەت و د ئەنجامێ دا تەنێ زیانێن مادی چێبوون.

رۆژا 20ێ گولانا بۆری ژی ئیسرایلێ ب مووشەکێن ئەرد-ئەرد ئێریشەک ل سەر ھندەک خالێن باشوورێ شامێ پێک ئانین و د ئەنجامێ دا 3 کەس ھاتبوون کوشتن.

ژ دەستپێکا کریزا سووریێ ڤە، ھەر جار ئیسرایل ئێریشی بارەگەھێن ئارتێشا سووریێ و میلیشیایێن سەر ب ئیرانێ ڤە دکە. ئیسرایل سووریێ تۆمەبار دکە کو ئەو رێ ددە ھێزێن سەر ب ئیرانێ ڤە ژ ناڤا سووریێ ڤە ئێریشی ئیسرایلێ بکن.