نوونەرێ تایبەتێ سەرۆکێ رووسیایێ بۆ سووریێ ئالیخاندەر لاڤرێنتیڤ راگه‌هاند، مۆسکۆ ئۆپەراسیۆنا پلانکری یا ترکیێ ل سووریێ ب گاڤەک نەرەوا دبینیت و داخواز ژ ئەنقەرێ دکەت کو ب ئاشتیانە پرسگرێکان چارەسەر بکەت.
ئیرۆ و سبە 15-16ێ خزیرانێ دانوستاندنێن ئاستانا یێن تایبەت ب سووریێ ڤه ل پایتەختا کازاخستانێ، نور سولتان برێڤە دچن، نوونەرێ تایبەتێ سەرۆکێ رووسیایێ ل سووریێ ئالیخاندەر لاڤرێنتیڤ، ئیرۆ د دەستپێکا دانوستاندنان دا دەربارێ گەفێن ترکیێ یێن ئه‌نجامدانا ئۆپەراسیۆنەکا لەشکەری ل تلرفعەت و منبجێ ئاخفت.
لاڤرێنتیڤ گۆت: «ل گۆری پلانێن سەرۆکۆمارێ ترکیێ ژ بۆ دەستپێکرنا ئۆپەراسیۆنەکا لەشکەری ل باکورێ سووریێ ل دژی هێزێن کوردی، ئەم د وێ باوەریێ دا نە کو ئەڤ یەک دێ بیته گاڤەکا نەئاقلانە و دێ ره‌وشێ نەئارام كه‌ت، راگەشیێ زێدە كه‌ت و ل ڤی وەلاتی قۆناغەکا نوو یا رووبرووبوونا چەکداری دێ ده‌ستپێكه‌ت».
ل گۆری لاڤرێنتیڤ، رووسیا د هەڤدیتنێن ئاستانایێ دا، دێ ژ هەڤکارێن خوە یێن ترک خوازیت کو دەست ژ ڤێ پێنگاڤێ بەردەن و مەترسیێن خوە ب رێیا دیالۆگێ ب داوی بینن.
هەروه‌ها لاڤرێنتیڤ د دەستپێکا دانوستاندنێن ئاستانایێ دا گۆتبوو ژی: ئالیێن بەشدار دێ رەوشا «ل سەر ئەردێ» گۆتووبێژ كه‌ن.
دانوستاندنێن ئاستانا یێن تایبەت ب کریزا سووریێ د مەها چلەیا 2017 دا ب گارانتیا رووسیا، ترکیێ و ئیرانێ و بەشداریا نوونەرێ نه‌ته‌وه‌یێن یه‌كبوویی یێ تایبەت بۆ سووریێ ستاففان دیمستورا ل ئاستانا پایتەختا کازخستانێ د ناڤبەرا شاندێن رژێم و ئۆپۆزسیۆنا سووریێ دا ده‌ستپێ کربوو.
هه‌رچه‌نده کو دانوستاندنێن ئاستانا ژ بۆ چارەسەریا سیاسی دەستپێ کربوو، لێ وەلاتێن گارانتیکار زێدەتر پرسێن لەشکەری دئێخن کارنامەیێن وێ و رێككه‌فتن پشتی هەر گەرەکێ دهێنه ئەنجامدان.
