ل داوەتەکێ کو ل «ئەسەنیورتا ستەنبۆلێ» هاتیە کرن ژ بەر کو زاڤا و 9 مێڤانێن کو ھاتنە داوەتێ شالێن کەسک-سۆر-زەر گرێدانە ب ئیدیعایا کو “پرۆپاگاندایا رێخستنا تەرۆرێ کرنە” ھاتنە دەستەسەرکرن.
ژ بەر داوەتا د 12ێ خزیرانێ دا ل قاتا دویەمینا سالۆنا مەھربرینێ یا شارەداریا «ئەسەنیورتێ» ھاتیە لدارخستن، پۆلیسان دوھ ژ بۆ ئیفادەیێ گازی زاڤا «مەسعوود کارچک» و 9 مێڤانێن کو بەشداری داوەتێ بوونە کرن.
10 کەسێن کو ژ بۆ ئیفادەیێ چوونە قەرەقۆلا «کراچێ» ھاتنە دەستەسەرکرن.
ھاتە زانین کو کەسێن ھاتنە دەستەسەرکرن ژ بۆ کو ل دادگەهێ ئیفادەیان بدن هاتنە ڤەگوهاستن بۆ دادگەها «بووکچەکمەجەیێ».
ژ بلی رەنگێن شالێ ستران ژی بوونە مژارا تاوانێ، سترانێن کو د داوەتێ دا ھاتنە گۆتن ژی وەکە تاوان ھاتنە نرخاندن و پۆلیسان ب ئیدیعایا کو “پرۆپاگاندایا رێخستنا تەرۆرێ کرنە” ئیفادەیێن کەسێن دەستەسەرکری وەرگرتنە.
ئەندامێ کۆمەلەیا یاساناسێن ئازادیخواز «حوسەیین بۆگاتەکن» ل سەر حەسابا خوە یا مەدیایا جڤاکی بوویەر پارڤە کریە.
