ترکیا ژ ھەڤالبەندێن خوە دلگرانە

ترکیا ژ ھەڤالبەندێن خوە دلگرانە

ترکیێ دلگرانیا خوە ل سەر سینۆردارکرنا ئۆپەراسیۆنا خوەیا لەشکەری یا پلانکری ل رۆژئاڤایێ کوردستانێ و باکورێ سووریێ نیشان دا، ژ بەر کو دوھی ھەلوەستا رووسیایێ دەرکەت ھۆلێ و وێ ئەو ئۆپەراسیۆن وەک “کریارەکا نەئاقلانە” نرخاند، ھەروھا ئامەریکا و ئەورۆپایێ ژی ئۆپەراسیۆنا وێ رەد دکن.

بەردەڤکێ ئاک پارتیێ عۆمەر چەلیک گۆت: “دەما وەلاتێ وی د شەرێ ل دژی تەرۆرێ دا پێنگاڤەکا نوو دهاڤێژە یان ژی پلانا ئۆپەراسیۆنەکا نوو دکە، ب تایبەتی ھندەک ژ ھەڤالبەندێن مە دلگران دبن.”

داخویانیێن «چەلیک» پشتی جڤینا کۆمیتەیا ناڤەندی یا ئاک پارتیێ ب سەرۆکاتیا سەرۆک کۆمارێ ترکیێ رەجەب تەییب ئەردۆگان شەڤا سێشەم/چارشەمێ ھات کو تێ دا ھەلوەستێن وەلاتێن ھەڤالبەند و دۆستێن ترکیێ دەربارێ ئۆپەراسیۆنا لەشکەری یا کو ئەردۆگان راگھاندبوو کو دێ ل منبج و تەل رەفعەت ئەنجام دەت، ھاتن نرخاندن.

د وێ دەربارێ دا بەردەڤکێ یەکتیا ئەورۆپایێ «لوس مەگوێل بۆوەن» راگھاند، یەکیتیا ئەورۆپایێ دەربارێ ئۆپەراسیۆنا پلانکری یا ل باکورێ سووریێ دا ژ ترکیێ داخواز دکە خوە بگرە و مەترسیێن خوە ب ریێن سیاسی و دیپلۆماسی چارەسەر بکە.

ھەر وھا نوونەرێ رووسیایێ یێ ژ بۆ سووریێ «ئەلکساندەر لاڤرەنتەڤ» دوھی د دەستپێکا دانووستاندنێن «ئاستانا»یێ دا راگھاند، رووسیا ئۆپەراسیۆنا پلانکری یا ترکیێ ل سووریێ، وەک کارەکێ نەعاقلانە دبینە، ژ بەر کو دبە سەدەما نەئارامیێ.

بەری وێ ژی، بەردەڤکێ وەزارەتا دەرڤە یێ ئامەریکا «نێد پرایس» گۆتبوو: “ئەم ھەر کارەکێ لەشکەری ل ھەرێمێ شەرمەزار دکن و پشتگرییا پاراستنا ھێلێن ئاگربەستێ یێن ھەیی دکن.”

پرایس گۆت ژی: “ئەم د نیگەرانیێن ترکیێ یێن ئەولەکاریێ یێن رەوا ل سەر سینۆرێ وێ یێ باشوور تێدگەهین، لێ ھەر ئێریشەکا نوو دێ ئارامیا ھەرێمێ پێتر تێک ببە و دێ ھێزێن ئامەریکی یێن د بن سیوانا ھەڤپەیمانیا ل دژی داعشێ دا کو ل ورن، ئێخیت مەترسیێ دا .”

پوستێن ھەمان بەش

کێ «ئوگور مومجوو» کو گۆتبوو دێ په‌یوه‌ندیێن «ئۆجالان و میتێ» ئاشکرا که‌م، کوشت؟

ugur mumca-darkamazi-arami