بەردەڤکێ سەرۆکۆماریا ترکیێ ئیبراھیم کالن دیار کر، سوێد دێ قانوونەکا نوویا ل “دژی تەرۆرێ” دەرخینە.
ل بروکسەلێ جڤینا ھەڤپارا ترکیا، سوێد و فینلاندایێ کو سەرلێدانێن وانێن ئەندامتیا ناتۆیێ ب ئیدیعایا کو پشتگریێ ددن پەکەکێ ئاستەنگ کریە ھات لدارخستن. بەردەڤکێ سەرۆکۆماریا ترکیێ ئیبراھیم کالن پشتی ھەڤدیتنێ داخویانیەک دا و گۆت: “سوێد وێ یاسایەکا نوویا ل دژی تەرۆرێ دەرخینە. “
ئیبراھیم کالن دا زانین، دێ گۆتووبێژێن دەربارێ فکارێن ترکیێ یێن دەربارێ ئەندامبوونا فینلاندا و سوێدێ د ناتۆیێ دا بەردەوام بن، لووتکەیا مادریدێ دیرۆکا داوین نابە.
کالن ئاشکەرا کر، وان ژ بۆ نوونەرێن فینلاندا و سوێدێ گۆتن، ناتۆ ھەڤپەیمانیەکا ئەولەھیێیە و وەلاتێن کو دخوازن ببن ئەندامێن وێ ھەڤپەیمانیێ، ناچارن کو پەیمانا ناتۆیێ تام ب جھ بینن و فکارێن ئەولەھیێ یێن وەلاتێن ئەندام ب جھ بینن.
کالن دەستنیشان کر، ئالیێن ھەڤدیتنێ ژ دل بوون و وێ ھەڤدیتنێن ب ڤی رەنگی بەردەوام بکن و گۆت، د پێڤاژۆیا پێش دا فاکتۆرا دیارکەر دێ گاڤێن بەربچاڤێن ھەر دو وەلاتان بن.
ھەری داوی کالن دا زانین، ئەو ل بەندێ نە کو سوێد دەربارێ “چالاکیێن پەکەکێ یێن ل سوێدێ” دا گاڤێن لەزگین باڤێژە و گۆت، د ڤی واری دا ژ رایەدارێن سوێدی داخویانیێن ئەرێنی بھیستنە، ژ 1ێ تیرمەھێ پێ ڤە قانوونەکا نوویا “تێکۆشینا ل دژی تەرۆرێ” وێ بکەڤە وارێ جیبجیکرنێ. تشتێ کو قەومی ئەڤە، وی گۆت، ئەوێ د پێشەرۆژێ دا ببینە.
