یەکیتیا ئەورۆپایێ بریار دا، ئوکراینا و مۆلدۆڤا وەکە دو بەرئەندامێن یەکیتیا ئەورۆپایێ وەربگرن.
سەرۆکێ رووسیایێ ڤلادمیر پوتین د 17ێ خزیرانا ئیسال دا گۆت کو یەکیتیا ئەورۆپایێ رێخستنەکا سیاسی و ئابۆرییە و مۆسکۆ ل دژی ئەندامبوونا وان نینە. لێ بەلێ چەند دەمژمێران پشتی بریارا یەکیتیا ئەورۆپایێ ژ بۆ وەرگرتنا وان ھەردو وەلاتان، جیگرێن نوونەرێ رووسیایێن ل نەتەوەیێن یەکبوویی و نوونەرێ رووسیایێ ل یەکیتیا ئەورۆپایێ، ئەڤ بریار وەکە دژمنکاری ب ناڤ کرن.
شارەزایێ سیاسی یێ ل مۆسکۆیێ ئیقبال دورە ژ بۆ کوردستان 24ێ راگھاند: “رووسیا نھا دخوازە ئەورۆپا یەکگرتی نەبە، لۆما ھەر پێنگاڤەک بەر ب ئاراستەیی زێدەبوونا ئەندامێن ل یەکیتیا ئەورۆپایێ، ژ ئالیێ مۆسکۆیێ ڤە وەکە نەرینی تێ دیتن، دەربارێ ئوکراینایێ دا رەوش خرابترە، د دەما بۆری دا سەرکردەیێن ئەورۆپایێ سەردانا کیەڤێ کرن و ھەموو داخویانیێن وان، ل رووسیایێ ب دژوار و گەفێن توند ھاتن دیتن، ژ بەر کو تەکەزی ل سەر زێدەکرنا ئالیکاریا سەربازی بۆ کیەڤێ دکرن.”
ئیقبال دورە دەستنیشان کر: “رووسیا د وێ باوەریێ دایە کو ئەڤ ئالیکاری ئارمانجێن ئۆپەراسیۆنێ ناگوھەرینە، لێ بەلێ رێژەیا قوربانیان دێ ل ھەر دو ئالیان زێدە بکە، تەڤی کو ئەورۆپا ئالیکاریا سەربازی ژ بۆ ئوکراینایێ زێدە دکە، لێ د ھەمان دەمێ دا پەترۆل و گازا رووسیایێ ژی دکرە، لۆما رووسیا ناخوازە ئەڤ پێوەندی ب تەمامی تێک بچە، ژ بەر کو زرارەکە مەزنا ئابۆریێ دێ ببینە.”
ھەر چقاس ئوکراینا وەکە بەرئەنداما یەکیتیا ئەورۆپایێ ھات وەرگرتن، لێ ڤێ رەوشا نھا یا ل وەلات دقەومە، بارگرانیەک دن ل سەر یەکیتیا ئەورۆپایێ دێ زێدە بکە.
جیگرێ سەرۆکێ پەیمانگەھا ئەورۆپا یا ل مۆسکۆیێ «ڤلادسلاڤ بەلۆڤ» ژ بۆ کوردستان 24ێ ئاخڤی و ئەشکەرە کر: “رووسیا دێ ل ھندەک پارێزگەھێن ئوکراینایێ بمینە و ئەنجاما وێ ژی زەلال نینە، ئەو بەردەوام دبە د پێداگریا ژ بۆ قەبوولکرنا ڤێ رەوشا دەرکەتی یا وان دەڤەران دا دکە، یەکیتیا ئەورۆپایێ و ئوکراینا ژی ھەول ددن کو وان دەڤەران ڤەگەرینن.”
ڤلادسلاڤ بەلۆڤ دیار کر: “کێشەیا رووسیایێ لگەل وەلاتێن سۆڤیەتا بەرێ تونەیە، ئەگەر پێوەندیا وان لگەل رۆژئاڤا ھەبە، لێ بەلێ یەکیتیا ئەورۆپایێ مەرجێ وێ ئەوە کو ئەو وەلات یان دڤێ لگەل رووسیایێ ھەڤپەیمان بن یان ژی لگەل وان. د سەردەما ئانگەلا مێرکل دا ھەول ھەبوو ل ئوکراینا سیاسەتەکا ب ڤی رەنگی بمەشینە و لگەل ڤلادمیر پوتین د نیقاشێ دا بوون، لێ بەلێ سەرۆکێ ئەنجوومەنا ئەورۆپایێ ل دژی ڤێ یەکێ بوو، تشتێ کو نھا ئەم دبینین، ئەنجاما سەرکێشیا ئەورۆپایێ بوو.”
