ل دیاربەکرێ، یەک ژ عەبایێن پێشەنگێ سەرھلدانا 1925ێ شێخ سەعید ئەفەندی ھات پێشاندان. ئەندامێن مالباتێ راگھاند کو ئەڤە 100 سالن ئەو عەبایێ شێخ سەعید دھلینن.
د چالاکیێن 97ەمین سالڤەگەرا دارڤەکرنا شێخ سەعید ئەفەندی و ھەڤالێن وی دا ل ئەیوانا «تاھیر ئەلچی» یا بارۆیا دیاربەکرێ ژی پانەلەک ھات لدارخستن. د پانەلێ دا مالباتا شێخ سەعید ئەفەندی، عەبایێ شێخ سەعید پێشان دا. یەک ژ نەڤیێن شێخ سەعید یێ ب ناڤێ «محەمەد قاسم فرات» گۆت؛ ئەڤ 100 سالن ئەو ڤی عەبایێ دھلینن و ئەڤ عەبا ژ بۆ وان ئێمانەتەک پیرۆزە.
د سالا 1925ێ دا شێخ سەعید ئەفەندی و 46 ھەڤالێن وی، ل دادگەھا ئیستیقلال یا شەرقێ ھاتن دادگەھکرن، دادگەھێ بریارا دارڤەکرنێ دا و مافێ تەمییزێ ژی نەدا وان. ئەڤ 97 سالن مالباتێن وان داخوازا ئاشکەرەکرنا جھێن گۆرێن وان دکن.
ژ بۆ کو جھێن گۆرا پێشەنگێ سەرھلدانا 1925ێ بێ ئاشکەراکرن ل دادگەھا ئیدارەیێ یا 5ەمینیا ئەنقەرەیێ دۆز ھاتبوو ڤەکرن و دادگەھێ ژ وەزارەتا کارێن ناڤخوەیا ترکیەیێ داخوازا بەلگە و ئاگاھیان و پاراستنێ کربوو. لێ بەلێ وەزارەتێ د بەرسڤا بۆ دادگەھێ رێکری دا راگھاند کو ئەو نە ئالییەکێ ڤێ دۆزێ نە و داخواز کر کو دۆز بێ بەتالکرن.
بارۆیا دیاربەکرێ و مالباتا شێخ سەعید ئەفەندی، بریارا وەزارەتێ رەد دکن و دبێژن؛ ھەتا کو جھێ گۆرا شێخ سەعید و ھەڤرێیێن وی بێن ئاشکەراکرن ئەو دێ سەری ل ریێن ھقووقی یێن ناڤخوەیی و ناڤنەتەوەیی بدن.
