ئۆپەراسیۆنا پەنچە قوفل یا کو د نیسانا 2022یێ دا ژ ئالیێ ئارتێشا ترکییێ ڤە ھاتبوو دەستپێکرن بەر دەوام دکە. ھەر دو ئالی ژی ھەما ھەما ھەر رۆژ ئاگاھیێن دەربارێ ئۆپەراسیۆنێ دا پارڤە دکن. گەر ئەم ل ئامارێن کو ھەر دو ئالیان ژ رۆژا ئەول ڤە بەلاڤدکن بنێرن، ھەژمارا کەسێن کو ھەتا نھا ژیانا خوە ژ دەست دانە 3000 کەس دەرباس کرنە.
گاڤا کەسێن کو د وارێ سیاسی، جڤاکناسی و لەشکەری دا شارەزا ل ڤان ئامارێن کو ھاتنە دایین دنێرن، د جھ دا تێدگھن کو ھەژمارێن ھەر دو ئالیان د دەربارێ ونداھییان و ھتد… دا دانە نە راستن. ھەر دو ئالی ژی ئامارێن نە راست تەنێ ژ بۆ کو لایانگرێن خوە بخاپینن و سەرکەفتنەکێ ل سەر مەدیایێ ب دەست بخن دبێژن.
ب تایبەتی ئەم دکارن ببێژن کو پەکەکە یا کو د ڤان سالێن داوی دا ل باکورێ کوردستانێ شکەستنەکا لەشکەری یا مەزن خوارییە، د خاپاندنا رایا کوردان دا ژ بۆ بەلاڤکرنا نووچەیێن نەراست دا سەرکەفتیترە. د راستیێ دا تێ گۆتن کو پەکەکە ژ سەدێ 60 یا ھێزا خوە یا پارتیا خوە دایە سەر شەرێ راگەهاندنێ. یانی پەکەکە ل سەر مەدیایێ ھەول ددە شەر و سەرکەفتنێ ب دەست بخە.
ھەلوەستا کێم یا راگەهاندنا ھەرێما کوردستانێ
د ڤێ ناڤبەرێ دا ھەر دو ئالی ژی شەرەکێ پرۆپاگاندایێ دکن. لێ مخابن دەزگەھێن راگھاندنێ یێن ھەرێما کوردستانێ ب کۆپی-پەستکرنا نووچەیێن کو پەکەکە و دەولەتا ترک بەلاڤدکە ڤە خزمەتا وان ھەردوو ئالییان دکە، رایا گشتی ژ راستیا بوویەرێن دقەومن ئاگاھدار ناکن. دەما کو گولەیەک ل قادەکێ دتەقە، د مەدیایا جڤاکی دا یەکسەر وەکە نووچەیا لەزگین دەرباس دبە و د نشکا ڤە ب رێیا مەدیایا جڤاکی ب مانشەتا “گەریلایێن ھەپەگێ ل بارەگەھا ترک دا” یان ژی “دو گەریلا ھاتن کوشتن” بەلاڤدبە. لێ مەدیایا ھەرێما کوردستانێ نکارە ئاستا پەڤچوونان و راستی و ئارمانجا شەری ئاشکەرا بکە.
ژ بەر ڤێ یەکێ گەلێ کو ل ھەرێما پەڤچوونێ ناژین، پرۆپاگاندایا کو دهێت کرن وەک راست دحەسێبینن. چەند ڤیدیۆیێن پەڤچوونێ یێن کو لایانگرێن وان بەلاڤ کرنە، دەنگێ چەند رۆکەتان مینا ئاستا شەری دیار دکن.
یێن کو ئالیێن پەکەکێ رەخنە دکن و ھەتا یێن کو ھەول ددن ئامارێن راستەقینە یێن شەرێ د ناڤبەرا ئارتێشا ترک و پەکەکێ یێ ل ھەرێما کوردستانێ دا بەلاڤ بکەن، راستی ئێریشا ھەر دو ئالیان تێن. ب تایبەتی ژی پەکەکە د ڤی واری دا شەرەکێ تایبەت و زەختەکا دەرۆنی ل سەر مەدیایا کوردی چێدکە. پەکەکە ونداھیێن خوە ڤەدشێرە ھەولێن ئاشکەراکرنا دەرەوێن وێ ژی وەکە خیانەتا ل کوردان دهێت نرخاندن.
لێ ھەلوێستا مەدیایا کوردستانی یا راست نە تەنێ پارڤەکرنا ھەژمارا کوشتی-بریندارا و ڤیدیۆیا پەڤچوونانە، ئەرکا ئەساسی ئاشکەراکرنا ئارمانج و مەبەستا ڤی شەرێ وێرانکارە.
ڤالا دەرخستنا پرۆپاگاندایا رەشا پەکەکێ
ھەتا نھا مەدیایا ھەرێما کوردستانێ نەکاریە سەدەمێن سەرەکی یێن شەرێ پەکەکێ و ئارتێشا ترک ئاشکەرا بکە. دەست ژ ڤێ یەکێ بەردن، نکارە ب تێرا خوە راڤە بکە کو راوەستانا ڤان ئۆپەراسیۆنا نە ئەرکێ ھەرێما کوردستانێیە، ئەرکێ دەولەتا ئیراقێیە. ژ بۆ رایا گشتی یا کوردان ژی ھێژ باش نە دایە فامکرن کو ترکیا ڤان ئۆپەراسیۆنان ل سەر بنگەھا کیژان پەیمانان ئەنجام ددەت.
ژ بۆ ڤێ ژی قاد ژ بۆ چاپەمەنیا پەکەکێ ڤالا ھاتییە ھشتن. مەدیایا پەکەکێ ب بەردەوامی ئیدیعا دکە کو ھەرێما کوردستانێ لگەل ترکیێ دا ئۆپەراسیۆنەکا ھەڤبەش پێک تینە و پێشمەرگە ل دژی گەریلا شەری دکە. مەدیایا کوردستانی ژی ھێژ بەرسڤا ڤێ یەکێ نەدایە.
لێبەلێ، ھەکە ئەم میناکەک پر ھێسان بدن؛ ھەری داوی مەدیایا پەکەکێ نڤیسیبوو کو ئارتێشا ترکیێ ژ باشوورێ کوردستانێ ھاتیە چیایێ کو دبێژنێ “گرێ ھەکاری” کو ژ ناڤەندا باژارێ ئامێدیێ ژی دهێت دیتن. یانی ل گۆری مەدیایا پەکەکێ، لەشکەرێن ترکیێ ھاتنە ناڤەندا باژارێ ئامێدیێ و ژ ور دەرباسی ھەرێما نهێلێ بوونە. وێ دەمێ دڤێت ھەموو گەلێ ئامێدیێ و نھێلێ ئەڤ یەک دیتبا. کوردێن کو نھا مەدیایا پەکەکێ دشۆپینن، ب تایبەتی ژی گەلێ باکورێ کوردستانێ ڤێ درەوێ وەکە راستی دزانن. لێبەلێ، تشتەک وسا قەد چێنەبوویە. دەولەتا ترک ب بالافرێن کو ژ ئامەدێ راببوون ئێرشی گرێ ھەکاری کربوو. ب ھەلیکۆپتەرێن کو ژ نەڤچەیا چەلێ رادبوون لەشکەر کێشان ناڤ نھێلییان. گەر نووچەگەھانەک بچە دەڤەرا ئامێدی و نھێلێ ژ گوندییان بپرسە “گەلۆ لەشکەرێن ترکان ل ناڤا گوندێ وەرا دەرباسی سەرێ مەتینا بوویە” دێ ھەر وێ گاڤێ دەرەوێن پەکەکێ هێنە پووچکرن. لێ مخابن، چ مەدیا و رۆژنامەڤان ڤێ یەکێ ناکن.
خوە ژ نوو ڤە برێخستن کرن
ھەر چقاس مەدیایا کوردستانی د وارێ تەکنیکی دا خوە پێشخستبە ژی، ژ بۆ ئاشکەراکرنا راستیێ ب ناڤەرۆکا نووچەیێ و دایینا بەرسڤێن راست ژ بۆ پرسێن راست پر کێم دمینە. ژ بۆ دەرباسکرنا ڤێ ژی دڤێت چاپەمەنی ژ نوو ڤە و ل گۆری شەرت و مەرجێن نوو خوە سەرەراست بکە، خوە پەروەردە بکە و خوە بگوھەرە. ئەرێ نییەتەکا پاک ھەیە، لێ ب قاسی نییەتا پاک خوە پەروەردەکرن و گوھەراندن ژی پێویستیەکە.
تێکلیەکا چاوا د ناڤبەرا پەکەکێ و ھێزێن ئارتێشا ترک یێن ل کانیماسێ و شێلادزێ ھەیە؟
گەر بەرخوەدانەک وسا مەزن ھەبە چما ل چیایێن باکورێ کوردستانێ دەنگێ یەک فیشەک ژی نایێ بھیستن؟ قارایلان د ئاخافتنا خوەیا 1ێ گولانێ یا ل ANFێ دا ھاتیە وەشاندن دا گۆت، ئەو ئێریشا ل دژی بنکەیێن ترکیا ل شێلادزێ ئێریشەکا ھشیاریێ بوو.
قارایلان گۆت، “ژ بەر ڤێ یەکێ ھشیاریەک بوو کو ئەڤ ھێزێن داگیرکەرێن بەرێ ل باشوور ب جھ بوونە، کو نەکەڤن ناڤا ڤی شەری دا. گەر ئەڤ ھێزە تەڤلی شەری ببن دێ ل ھەر دەرێ ببن ئارمانجا ھێزێن مە. ئەڤ دەرفەتە مە ھەنە. ئەز باوەرم کو ئەڤ پەیاما من دێ گەهیتە جییێ پێوەندیدار.” قارایلان، کو ئەڤ ئاخافتن ب جیھازێ بێتێلا مەزن گەهاند، پەیامەک نەراستەراست ژ بۆ ھێزێن ترکیا یێن ل باشوورێ کوردستانێ شاند. ئەڤ دهێت وێ واتەیێ کو پەکەکە ل باشوورێ کوردستانێ لگەل ھندەک ھێزێن داگیرکەر یێن دەولەتا ترک شەری دکە، لگەل ھندەکان ژی شەری ناکە. میناک ل شێلادزێ شەرێ ھێزێن ترکا نەدکر ژ بەرکو د ناڤبەرا وان دا ھەڤدیتن و لھەڤکرن ھەبوو. پەکەکێ و ھێزێن ترک یێن شێلادزێ پەیمانا شەرنەکرنێ چێکر بوو. لێ ئەڤ پەیمانا کەڤن ب ڤێ ئۆپەراسیۆنا داوی یا زاپێ تێکچوو.
