سەکرەتەرێ گشتی یێ ناتۆیێ راگهاند، په‌كه‌كه د لیستەیا تەرۆرێ یا سوێد و فینلاندا و هه‌روه‌ها هەموو ئەندامێن یەکیتیا ئەورۆپایێ دایە و گۆت: «هەڤکاریا ل دژی په‌كه‌كێ گەلەک گرنگە».
یێنس ستۆلتەنبێرگ ل پارلامەنتۆیا ئەورۆپایێ بەشداری روونشتنەکا ل سەر ئەنجامێن لووتکەیا مه‌دریدێ و هەڤکاریا یەکیتیا ئەورۆپا-ناتۆیێ بوو، ستۆلتەنبەرگ دیار کر کو ناتۆ ژ داویا شەرێ سار سیسته‌مێن پاراستن و به‌رگریا ب كۆم پێشخستنه و نووڤه‌كرنه.
ده‌ربارێ په‌كه‌كێ ستۆلتەنبێرگ دیار کر، سوید و فینلاندا دێ ل گەل ترکیێ زێدەتر کار که‌ن و گۆت: «په‌كه‌كه د لیستەیا تەرۆرێ یا سوێد و فینلاندا و هه‌روه‌ها هەموو ئەندامێن یەکیتیا ئەورۆپایێ دایە».
ستۆلتەنبەرگ هه‌روه‌ها ده‌ستنیشان كر، پارڤەکرنێن هەوالگیریێ، کارکرنا ب هەڤ رە و رادەستکرنا داخوازکریان مژارەکا گرنگە.
سەکرەتەرێ گشتیێ ناتۆیێ دەربارێ رادەستکرنا داخوازکریان بۆ ترکیێ ژی وه‌ها گۆت: «رادەستکرن دێ ل گۆر پەیمانا دادگەها ئەورۆپایێ بیت».
رۆژا 28ێ خزیرانا 2022، د رۆژا یەکەم یا لووتکەیا ناتۆیێ دا ل مه‌دریدا پایتەختا ئیسپانیا، جڤینەک هاتە کرن و هەرسێ وەلاتان، ترکیە، فینلاندا و سوێد ژ بۆ بەردەوامیا پشتەڤانیا ل دژی هەر گەفەکا ل سەر ئەولەکاریا هەڤدو، پەیمانەک ئیمزا کرن.
ئاستەنگکرنا چالاکیێن په‌كه‌كێ و رادەستکرنا کەسێن کو ترکیە وان وەکە تەرۆریست ب ناڤ دکەت، خالێن سەرەکی یێن ناڤەرۆکا پەیمانێ بوو.
پشترە ژی وەزیرێ دادێ یێ ترکیێ بەکر بۆزداگ دا خویاکرن، ب تۆمەتا ئەندامتیا رێخستنێن تەرۆرێ، وان ژ سوێد و فینلاندایێ داخوازا رادەستکرنا 17 ئەندامێن په‌كه‌كێ و 16 ئەندامێن جەمائەتا گولەن کرنە.
