نەتەوێن یەکبوویی: «په‌كه‌كه و په‌یه‌ده زارۆكان دره‌ڤینن»
نەتەوێن یەکبوویی دیارکر، وێ بنپێکرنێن مه‌زن يێن ئالیێن جودا ل سووریێ، د ناڤ وان دە پارتیا کارکەرێن کوردستانێ «په‌كه‌كه» و باسکێ وێ یێ سووریێ، پارتیا یەکیتیا دەمۆکرات «په‌یه‌ده» ل دژی زارۆکان د سالا 2021ێ دا پشتراست کرنە، نیگەرانیا خوە ژی ژ زێدەبوونا بکارئانینا زارۆکان د پەڤچوونان دا ل ڤی وەلاتی دیار كر.
راپۆرتا گوتەرەس چ ئه‌شكه‌ره كریه؟
راپۆرتا سەکرەتەرێ گشتی یێ نەتەوێن یەکبوویی، ئانتۆنیۆ گوتەرەس، ب سەرناڤێ «زارۆک و پەڤچوونێن چەکداری یێن سالا 2021» دا، دیار کر 1296 زارۆک 1258 ژ وان کور و 38 کەچ ژ ئالیێ گه‌له‌ك گرووپ و رێخستنان ڤە هاتنە لەشکەرکرن و پرانیا ڤان زارۆکان د شەرێن سووریێ دا هاتن بکارئانین.
ل گۆری راپۆرتێ، 221 حاله‌تێن لەشکەرکرنێ ل هەرێمێن د بن کۆنترۆلا هێزێن سووریەیا دەمۆکراتیک دە هاتنە تۆمارکرن، ژ وان 220 ل یەکینەیێن پاراستنا گەل یه‌په‌گێ و یەکینەیێن پاراستنا ژن یه‌په‌ژێ، یێن گرێدایی پارتیا یەکیتیا دەمۆکراتیک په‌یه‌دێ.
بنپێكرنێن هه‌سه‌دێ و جوانێن شۆره‌شگه‌ر
راپۆرتێ نیگەرانیەکا مه‌زن دەربارێ زێدەکرنا لەشکەرکرن و بکارئانینا زارۆکان ژ ئالیێ هێزێن سووریەیا دەمۆکراتیک هه‌سه‌دێ ڤە نیشان دا یه و داخواز كریه كو ده‌ڤ ژ وان هه‌موو بنپێکرنان به‌ردن.
د دەواما راپۆرتێ دا هات گۆتن: 10 زارۆک د ناڤا تەڤگەرا جوانێن شۆرەشگەر دا، 5 زارۆک د ناڤا تەڤگەرا نوورەدین ئەل-زەنکی دا، 2 زارۆک د ناڤا هێزێن رزگاریا عەفرینێ دا، هاتنه ته‌ڤلی كرن.
د راپۆرتێ دا هات راگهاندن کو د ناڤا هێزێن ئەولەکاریا هوندرین یێن د بن سەروەریا رێڤەبەریا خوەسەرا باکور و رۆژهلاتێ سووریێ یا گرێدایی په‌یه‌دێ دا، 24 زارۆک هاتنە لەشکەرکرن و نەتەوێن یەکبوویی ژی رەڤاندنا 8 زارۆکان 2 کوڕ و 6 کەچ ژ ئالیێ جوانێن شۆرەشگەر یێن په‌كه‌كێ و 5 ژی ژ ئالیێ پارتیێن “نەناس” ڤە پشتراست كریه.
چه‌ته‌یێن تركیێ بنپێكرنێن مه‌زن ئه‌نجام دانه
ده‌ربارێ هەژمارا زارۆکێن کو ژ ئالیێ ملیسێن ئالیگرێن ترکیێ یێن سەر ب ئارتێشا نشتمانی یا سووریێ ڤە هاتنە وەرگرتن گه‌هشت 569 زارۆكان و ب ڤی ره‌نگی:
گرووپا ئەل-شام 103 زارۆک.
لیوایا ئەل-هەمزات 48 زارۆک.
ئەهرار ئەل-شام 41 زارۆک.
سوقور ئەل-شام 38 زارۆک.
ئەنیا ئەل شەرقیە 23 زارۆک.
سولتان موراد 19 زارۆک.
ئەنیا شام 16 زارۆک.
ئەنیا ئیسلامی 16 زارۆک.
جەیش ئەل-ناسر 8 زارۆک.
جەیش ئەل-شەرقیە 7 زارۆک.
سەمەرقەند 5 زارۆک.
مەرتالێ فەراتێ 4 زارۆک.
پارتیا ترکمەن 2 زارۆک .
بەشا ئەل-موعتەسم 2 زارۆک .
ئەهرار ئەل-شەرقیە 1 زارۆک.
جەیش ئەل-سووننە 235 زارۆک.
هەیەت تەحریر ئەل-شام (جەبهەت ئەل-نوسرا بەرێ) ل گۆری راپۆرێ، 380 زارۆك.
په‌كه‌كێ و په‌یه‌دێ ب سەدان زارۆکێن کورد ره‌ڤاندنه
دەربارێ هێزێن رێژیما سووریێ و یێن گرێدایی وێ دا، راپۆرتێ دیار كریه ئەو بەرپرسن ژ تەجنیدکرنا 46 زارۆکان، د هەمان دەمێ دا ملیسێن سەر ب رێژیمێ ڤە، د ناڤ وان دا هێزێن بەرەڤانیا نشتمانی، 35 زارۆک لەشکەر کرنه.
ل گۆری هەمان راپۆرتێ، نەتەوێن یەکبوویی 45 ئێریش ل سەر 28 دبستان و 17 نەخوەشخانەیان پشتراست کرنە، 23 ژ وان ئێریشان هێزێن رەژیما سووریێ، 8 ژی هێزێن ئەرکا خوەپاراستنێ یێن هه‌سه‌دێ ژێ بەرپرسیارن و «ئاساییشا په‌یه‌دێ» ژ 3 ئێریشان بەرپرسیارن و ئالیێن ئۆپۆزیسیۆنێ ژی ژ 3 ئێریشان بەرپرسیارن.
شرۆڤەکار د وێ باوەریێ دا نە بنپێکرنێن کو ژ ئالیێ هەموو ملیسێن شەرکەر ل سووریێ و کوردستانا سووریێ ل دژی هەموو چینێن خەلکێ تێنە کرن، گەلەک زێدەترن، ب تایبەتی بنپێكرنێن ل سه‌ر زارۆكان یێن كو ژ هێلا په‌كه‌كێ ڤه تێنه ئه‌نجام دایین.
نه‌ته‌وێن یه‌كبوویی پشتراست دکه‌ت هەژمارێن کو د راپۆرتێ دا هاتنە دەستنیشان کرن راستیا ل سەر ئەردێ نیشان نادن، ب راستی ئەڤ هەژمار پر مەزنترن.
هێژای گۆتنێ یه، په‌كه‌كه و دەست و باسکێن وێ و ب تایبەتی پارتیا یەکیتیا دەمۆکرات (په‌یه‌دێ) ب سەدان زارۆکێن کورد یێن تەمەنێ وان د ناڤبەرا 14 و 15 سالی دا لەشکەر کرنە، دا کو وان د شەرێ خوە دا بکار بینن.
