ئالیکارا جیگرێ وەزیرێ بەرەڤانیێ یێ ئامەریکایێ «دانا ستروول» راگھاند، ئەو ل دژی ئۆپەراسیۆنەکا نوویا ترکیا ل سووریێ نە. «ستروول» گۆت کو ئۆپەراسیۆنا ترکیێ د بەرژەوەندیا داعشێ دایە.
رادیۆیا دەنگێ ئامەریکا راگەھاندیە، ئالیکارا جیگرێ وەزیرێ بەرەڤانیێ یێ ئامەریکایێ «دانا ستروول» ل سەر ئەگەرا ئۆپەراسیۆنا ترکیێ یا ل رۆژئاڤایێ کوردستانێ و باکورێ سووریێ نەرازیبوون نیشان دایە.
دانا ستروول رۆژا چارشەمبێ ل واشنگتۆنێ د فۆرومەکێ دا دیار کریە، ئەو دێ ب توندی دژی ھەر ئۆپەراسیۆنەکا ترکیێ یا ل سووریێ دەربکەڤن و د ڤێ مژارێ دا نەرازیبوونا خوە گھاندنە ترکیا.
دانا سترۆول دیار کر ژی، ئۆپەراسیۆنا ترکیێ ب کێری داعشێ تێ و وھا گۆت؛ گەلەک گرتیێن داعشێ د گرتیخانەیێن ھەسەدێ دانە، ئەگەر ترکیا ئۆپەراسیۆنێ بکە و ھەسەدە بەرێ خوە بدە بەر ئالیێ باکور و سینۆری، دێ ئێرشێن داعشێ زێدەتر بن. ستروول گۆت کو ئۆپەراسیۆنا ترکیێ، دێ تەکۆشینا ئامەریکا یا ل دژی تەرۆرێ ئێخیت مەترسیێ.
د دەربارێ ھەسەدێ دا ژی، ئالیکارا جیگرێ وەزیرێ بەرەڤانیێ یێ ئامەریکا وھا گۆت، ئەگەر ھەسەدە د بن زەختان دا بمینە، دبە بکەڤە د بن بانێ ھندەک وەلاتێن دن دا، دبە ژی ھەسەدە لگەل سووریا، رووسیا و ھەتا ئیرانێ ژی ھەڤالبەندیێ بکە.
