وەزارەتا دەرڤەیا ترکیێ ل سەر تۆپبارانا زاخۆیێ داخویانیەک بەلاڤ کر و راگھاند: “ترکیا ژ بۆ ئاشکەراکرنا راستیان ئامادەیە کو ھەموو گاڤان باڤێژە.”
د داخویانیا وەزارەتا دەرڤەیا ترکیێ دا ھات دیارکرن: “ب خەمگینیەکا مەزن ڤە ئاگاھیا وێ یەکێ ھات کو ئیرۆ ل ناڤچەیا زاخۆیا سەر ب پارێزگەھا دوھۆکێ ل قەراخا چەمەکی ئێریشەک ھاتیە ئەنجامدان و ل گۆر زانیاریێن دەستپێکێ، 8 کەسان جانێ خوە ژ دەست دانە و 23 کەس ژی بریندار بوونە.”
وەزارەتا دەرڤەیا ترکیێ دەستنیشان کر: “ئەم ژ بۆ کەسێن کو د ڤێ بوویەرا دلئێش دا جانێ خوە ژ دەست دانە، ژ خوەدێ رەحمەتێ دخوازین و سەرساخیێ د سەری دا ل مالباتێن وان، ل خەلکێ دۆست و برایێ ئیراقێ و حکوومەتا وێ دکن و ژ بۆ برینداران باشبوونا بلەز دخوازین.”
ھەروھا ئەشکەرە کر: “ترکیا ل دژی ھەموو وان ئێریشانە، کو سڤیلان دکن ئارمانج. ترکیا تێکۆشینا خوەیا ل دژی تەرۆرێ، ل گۆر یاسایێن ناڤدەولەتی، ب ئاستەکا بلندا ھەستیاریا پاراستنا سڤیلان، پاراستنا ژێرخانا سڤیل، شوونوارێن دیرۆکی و چاندی، دمەشینە. وسا تێ نرخاندن کو ب ئێریشێن ب ڤی رەنگی یێن کو مرۆڤێن بێتاوان دکن ئارمانج و چاڤکانیا وان رێخستنا تەرۆرێیە، ھەلوەستا وەلاتێ مەیا رەوا و ب بریارا ل ھەمبەر تێکۆشینا تەرۆرێ تێ ئارمانجکرن.”
د داخویانیێ دا ھاتیە دیارکرن: “ترکیا ژ بۆ ئاشکەراکرنا راستیان ئامادەیە کو ھەموو گاڤان باڤێژە.”
وەزارەتا دەرڤەیا ترکیێ دبێژە: “ئەم بانگ ل رایەدارێن حکوومەتا ئیراقێ دکن کو د بن باندۆرا گۆتن و پرۆپاگاندایا رێخستنا تەرۆرێ دا داخویانیان نەدن و ژ بۆ دەرخستنا ئەنجامدەرێن راستەقینێن ڤێ بوویەرا دلتەزین، ھەڤکاریێ بکن.”
