سەرۆکوەزیرێ ئیراقێ مستەفا کازمی ژ ئارتێشا وەلاتێ خوە داخواز کر، د ڤێ قۆناغێ دا بالا خوە بدن زانیاریێن ئیستخباراتی و ئاستا پەروەردەیا سەربازی ژی بلند بکن، ب ئاوایەکێ بەردەوام د دەما ھەبوونا گەفا تەرۆر و دەستدرێژیا بۆ سەر ئاخا ئیراقێ دا، د ئامادەباشیێ دا بن.
ئۆفیسا راگھاندنێ یا سەرۆکوەزیرێ ئیراقێ ئیرۆ پێنجشەمێ 21ێ تیرمەھا 2022یێ داخویانیەک بەلاڤ کر و راگھاند، سەرۆکوەزیر و فەرماندارێ گشتی یێ ھێزێن چەکدار مستەفا کازمی سەرپەرشتیا جڤینەکێ لگەل سەرکردەیێن ئەولەھی و سەربازی یێن وەزارەتا بەرەڤانیێ کر.
د داخویانیێ دا ھات دیارکرن، مستەفا کازمی د جڤینێ دا بال کشاند سەر رۆلا ئارتێشا ئیراقێ و گۆت، ژ دەستپێکا راگھاندنا کابینەیا وی ڤە، ژ بۆ دامەزراندنا سازیەکا سەربازی یا بھێز، پشتەڤانیا ئارتێشێ کریە، دا کو ب ڤێ رێیێ سینۆرێن ئیراقێ و وەلاتیێن وێ پاراستی بن.
ھەروھا د داخویانیێ دا ھات دەستنیشانکرن، ژ بەر بنپێکرنێن دوھی یێن ل زاخۆیێ، دڤێ ئارتێش د پەروەردەیێ دا بەردەوام بە و پێویستیێن وێ بهێن دابینکرن، دا کو د دەما ھەبوونا دەستدرێژیێ دا، ژ بۆ رووبرووبوونێ ئامادە بە.
دوھی ژ بەر تۆپبارانکرنا دەڤەرەکا گەشتیاریێ یا ل ئیدارەیا سەربخوەیا زاخۆیێ، 9 کەس شەھید بوون و 29 کەس ژی بریندار بوون. ل سەر تۆپبارانێ چەندین داخویانیێن نەرازیبوونێ ھاتن دەرخستن و رۆژا یەکشەمبێ ژی پارلامەنتۆیا ئیراقێ ل سەر ڤێ مژارێ دێ جڤینەکێ ل دار بخە.
