رەوانگەھا سووری یا مافێن مرۆڤان راگھاند، درۆنەکا ئارتێشا ترکیێ ترۆمبێلەکا فەرماندارەکێ ھێزێن سووریەیا دەمۆکراتیک (ھەسەدێ) ل نێزیکی گرێ سپی کرە ئارمانج.
رەوانگەھێ بەلاڤ کر، درۆنەکا ئارتێشا ترکیێ شەڤا بۆری ترۆمبێلا فەرماندارەکێ ھەسەدێ ل گوندێ بیر عەرەب یێ سەر ب گرێ سپی ڤە بۆمبەباران کر و د ئەنجامێ دا، ئەو فەرماندارێ ھەسەدێ ھات کوشتن.
ھەتا نھا ژ ئالیێ ھەسەدێ ڤە چ پشتراستکرن یان رەدکرن دەربارێ ڤێ ئێریشێ دا نەھاتیە دایین.
ئەڤ ئێریش پشتی وێ تێ کو درۆنەکا ئارتێشا ترکیێ رۆژا 22یێ ڤێ مەھێ ترۆمبێلەکا ھەسەدێ ل سەر ریا قامشلۆ – تربەسپیێ بۆمبەباران کر و تێ دا جیگرا فەرماندارێ گشتی یێ ھەسەدێ سەلوا یووسف (ژیان عەفرین) و دو شەرڤانێن دنێن ژن ھاتن کوشتن.
دەمەکە، ترکیا گەفا ئۆپەراسیۆنەکا نوو ل سەر تل رەفعەت و منبجێ دکە. ترکیێ و کۆمێن چەکدار ژی ھێزێن زێدەتر ل نێزیکی وان ھەر دو باژاران کۆم کرنە و ئەو ھێز خستنە رەوشا ئامادەھیێ.
