ده‌وله‌تا ترك ئیرۆ ئامارێن مه‌ها تیرمه‌هێ یێ زرارێن جانی یێن په‌كه‌كێ ئیلان كرن و ل گۆری وێ، 68 گه‌ریلا هاتنه كوشتن.
به‌رده‌ڤكێ وه‌زاره‌تا كارێن ناڤخوه یا تركیێ، ئیسلام چاتاكلی ئیرۆ رۆژا چارشه‌می 3/8/2022ێ ئه‌شكه‌ره كر، د مه‌ها تیرمه‌ها سالا 2022ێ ده، ئارتێشا تركیێ ل ناڤ و ده‌رڤه‌ی وه‌لات 68 چه‌كدارێن رێخستنا په‌كه‌كێ كوشتنه.
هه‌روه‌ها ده‌ستنیشان كر، ژ سه‌رجه‌ما ڤان چه‌كداران، 7 ژێ فه‌رماندار بوونه.
د ڤێ ده‌ربارێ ده ناڤەندا چاپەمەنی و راگهاندنێ یا هه‌په‌گێ هه‌ر رۆژ بێ ناڤبر داخویانیان دده و دبێژه مه ئه‌وقاس عه‌سكه‌ر كوشتنه.
د داخویانیێن چاپه‌مه‌نیێ یێن هه‌په‌گێ ده كو د مه‌ها تیرمه‌هێ ده هاتنه پارڤه‌كرن، هه‌ری كێم 200 عه‌سكه‌ر هاتنه كوشتن.
هه‌ر یێك ژ رێخستنا په‌كه‌كێ و ئارتێشا تركیێ هه‌ر ل ناڤبه‌را چه‌ند رۆژان ئامارا شه‌رێ خوه یێ ساخته ئه‌شكه‌ره دكن و هه‌ر یێك دبێژه مه ئه‌وقاس كوشتنه، لێ به‌لێ هه‌ردو ئالی راست نابێژن و ته‌نێ یێ كو زرارێ ژ ڤی شه‌ری دبینه گه‌لێ هه‌رێما كوردستانێ یه.
