ئارتێشا ئیسرایلێ راگھاند، ھەتا نھا زێدەتری 30 ئێریشێن ئەسمانی بۆ سەر غەزەیێ ئەنجام دانە.
ئارتێشا ئیسرایلێ د داخویانیەکێ دا ئاشکەرا کر، تەڤگەرا جیھادی یا ئیسلامی 160 کاتیۆشا و مووشەک ئاراستەیی ناڤچەیێن ئیسرایلێ کرنە و ب رێیا سیستەما بەرەڤانیێ ڤە کارینە 60 مووشەکان تێک ببن و 30 مووشەک ژی ل ناڤ غەزەیێ کەتنە خوارێ.
ھەروھا دیار کریە، ھەتا نھا زێدەتری 30 ئێریشێن ئەسمانی کرنە سەر پێگەھێن چەکدارێن تەڤگەرا جیھادی یا ئیسلامی و 40 ئارمانج ھاتنە لێدان، کو ب رێیا 55 مووشەکان بوویە.
ڤێ سبێ ھێزێن ئیسرایلێ 20 کەس دەستەسەر کرن، کو ژ وان 19 کەس ئەندامێن تەڤگەرا جیھادی یا ئیسلامێ بوون.
وەزارەتا تەندروستیێ یا فلستینێ یا ل غەزەیێ راگھاند، ژ بەر ئێریشێن ئیسرایلێ 10 کەس ھاتنە کوشتن و 79 کەس ژی بریندار بوونە، یەک ژ وان کوشتیان زارۆکەکێ 5 سالییە.
دوھ فرۆکەیێن بێفرۆکەڤان یێن ئارتێشا ئیسرایلێ سێ جھێن غەزەیێ ئارمانج کرن، یەک ژ ئارمانجا ئێریشان، ئاڤاھیەکێ نشتەجیبوونێ بوو، ل رۆژئاڤایێ پارێزگەھا خان یوونس یا ل باشوورێ غەزەیێ ژی ئێریشی پێگەھەکا تەڤگەرا جیھادی یا ئیسلامی ھات کرن.
