ئارتێشا ئیسرائیلێ راگهاند، نێزیکی 20 ئەندامێن تەڤگەرا جیهادا ئیسلامی هاتنە دەستەسەر کرن، وەزارەتا تەندورستیێ یا غه‌ززه‌یێ ژی راگهاند، ل غه‌ززه‌یێ 6 ژێ زارۆک، 32 کەس هاتن کوشتن.
ئارتێشا ئیسرائیلێ ئیرۆ یەکشەمێ راگهاند، سەرکردایەتیا بلندا تەڤگەرا جیهادا ئیسلامی ل غه‌ززه‌یێ هاتیە بێباندۆرکرن، پشتی کو ئارتێشێ کوشتنا فەرماندارێ هەرێما باشوور یا تەڤگەرا جیهادێ خالد مەنسوور راگهاندی.
ئەڤ یەک د دەمەکێ دە یە کو ئارتێشا ئیسرائیلی راگهاند، وان نێزیکی 20 ئەندامێن جیهادا ئیسلامی ل كه‌نارێ رۆژئاڤا دەستەسەر کرنە.
رۆژا ئینێ، ئیسرائیلێ ئێریشێن ئاسمانی ل سەر غه‌ززه‌یێ پێک ئانین و د ئەنجامێ دە 7 کەس هاتن کوشتن، کو د ناڤ وان دە تایسر ئەل-جەبەری، یەک ژ سەرکردەیێن ناڤدارێن تەڤگەرا جیهادێ ل غه‌ززه‌یێ هەبوو.
سەرفەرماندارێ ئارتێشا ئیسرائیلێ ئاڤڤ کۆهاڤی دوهی شەمیێ راگهاند، وەلاتێ وی دێ دەربەیەکە کوژەر ل تەڤگەرا جیهادا ئیسلامی ل هەرێما غه‌ززه‌یێ بدە.
هەروه‌ها ل گۆری بەردەڤکێ ئارتێشا ئیسرائیلێ ئاڤچای ئادرائە ل سەر تویته‌رێ گۆت: “پلانێن مەیێن جووربەجوور هەنە. ئەم رێ نادن کو ت رێخستن ل ڤر، ل باکور و ل كه‌نارێ رۆژئاڤا زیانێ بگهینە سەروەرییا دەولەتا ئیسرائیلێ».
ئیسرائیل دبێژە، ئەو نەچار بوو کو ئۆپەراسیۆنەک «پێشگر» ل دژی تەڤگەرا جیهادا ئیسلامی بدە دەستپێکرن. تەکەز دکە ژی، تەڤگەرا جیهادێ پلانا ئێریشەک نێزیک دکر.
ژ ئالیێ خوە ڤە، وەزارەتا تەندورستیێ یا هەرێما غه‌ززه‌یێ راگهاند، ل غه‌ززه‌یێ 6 ژێ زارۆک، 32 کەس هاتن کوشتن و زێدەتر ژ 215 کەسان بریندار بوون.
