سەرۆکێ گشتی یێ پارتیا «دەڤا»یێ عەلی باباجان، ل وانێ د دەربارێ پرسگرێکا کورد دا ئاخڤی. باباجان د ئاخافتنا خوە دا بانگ ل دەستھلاتداریا ترکیەیێ کر و دا زانین کو پرسگرێکا کورد، تەنێ ب ئاخافتنان چارەسەر نابە.
عەلی باباجان، د ڤەکرنا ئاڤاھیا پارتیا خوا یا «ئەرجیشا وانێ» دا ل سەر پرسگرێکێن باکور و ترکیایێ ئاخڤی.
باباجان دا زانین کو ل ترکیایێ تەنێ پرسگرێکا ئابۆریێ نینە، پرسگرێکا کورد ژی ھەیە. عەلی باباجان ب بەردەوامی گۆت، “ئەز ل ڤێ دەرێ بانگ ل رەجەب تەییب ئەردۆگان و دەولەت باخچەلی دکم، ل ڤی وەلاتی تەنێ قەیرانا ئابۆریێ نینە، پرسگرێکا کورد ژی ھەیە. مرۆڤ ل ئەنقەرەیێ روونە و ببێژە “پرسگرێکا کورد نینە ئەڤ پرسگرێە چارەسەر نابە.”
سەرۆکێ گشتی یێ پارتیا دەڤایێ عيلی باباجان، بال کشاند سەر پێڤاژۆیا سەردەمێن بەرێ و گۆت، “ھوون دزانن کو نھا ل ترکیایێ پرسگرێکا کورد ھەیە. دەما ئەم ژی د ناڤ دا بوون، مە دگۆت، پرسگرێکا کورد ھەیە و ئەڤە پرسگرێکا مەیە.”
ئەز ل ڤێ دەرێ بانگ ل وەلاتیێن مەیێن کورد دکم. ئەم دێ پرسگرێکێ د بنگەھا وەلاتیبوونێ دا چارەسەر کەین. دەولەت نەچارە ب ھەمان دلسۆزیێ ھەر وەلاتیێ خوە ھەمبێز بکە. وەکی دن یەکیتیا ڤی وەلاتی چێنابە.”
