ھێزێن ترکیێ یێن کو ل سەر سینۆر ب جھ بوونە، خالەکا لەشکەری یا رێژیما سووریێ ل سەر رێیا دربێسیێ – عاموودێ ئارمانج کر.
رەوانگەھا سووری یا مافێن مرۆڤان دیار کر، ھێزێن ئارتێشا ترکیێ یێن ل دەردۆرا سەرێ کانیێ ب جھ بوونە، گوندێ ئەل-تاویلاھێ ل گوندەوارێ تل تەمرێ یێ دکەڤە باکورێ رۆژئاڤایێ حەسەکێ بۆمبەباران کر و تۆپ ل گوند و دەردۆرا وێ کەتن.
دا زانین ژی، ھێزێن ترکیێ خالەکا رێژیما سووریی ل نێزیکی عاموودێ تۆپباران کر و ھەر وھا چەند تۆپ ل دەردۆرا گوندێن «تل حەمدوون، جرنک، خەرزا و خانکا» یێن سەر ب عاموودێ ڤە کەتن.
رەوانگەھێ دەستنیشان کر ژی، ئیرۆ دانێ سبێ ھێزێن ترکیێ دەڤەرێن زرگان و دەردۆرا وێ کرن ئارمانج، د ھەمان دەمێ دا درۆنەکا ترکیێ برجا ھێلێن پێوەندیان ل ناحیا ئەبوو راسێن یا ل باکورێ حەسەکێ بۆمبەباران کر کو ب ڤێ سەدەمێ ھێلێن پێوەندیێ ل ھەرێمێ ھات برین.
دوھی ژی ئارتێشا ترکیێ ھەژمارەک گوندێن قامشلۆ، دربێسیێ و عاموودێ دابوون بەر تۆپان. د ئەنجاما تۆپبارانا ل سەر گوندێ تەل زوانێ ل رۆژھلاتێ قامشلۆ دا وەلاتیەکی سڤیل بریندار ببوو.
