سەکرەتەرێ گشتی یێ پارتیا وه‌ته‌ن ئۆزگور بورسال راگهاند کو دێ شاندەیەک بۆ هەڤدیتنا ل گەل سەرۆکێ سووریێ بەشار ئەسه‌د بچە شامێ و دۆغو پەرینچەک و ئەدهەم سانجاک ژی د ناڤ شاندەیێ جهـ دگرن.
سەکرەتەرێ گشتی یێ پارتیا وه‌ته‌ن ئۆزگور بورسال د کانالا تەلەڤیزیۆنا دۆغو پەرینچەک دە ئەشکەرە کر کو د ناڤ 10-15 رۆژان دە دێ شاندەیەک بۆ هەڤدیتنا ل گەل سەرۆکێ سووریێ بەشار ئەسه‌د بچە شامێ.
بورسال گۆت: «د 10-15 رۆژێن بێ دە شاندا پارتیا مە ب سەرۆکاتیا برێز دۆغو پەرینچەک دێ بچە سووریێ و ل گەل سەرۆکێ سووریێ بەشار ئەسه‌د بجڤن. د شاندەیا مە دە ئەدهەم سانجاک و چەند کەسایەتیێن گرینگ ژی جهـ دگرن. دەربارێ سەردانێ دە دەما پێش ئەمێ هوورگلیان ئەشکەرە بکن».
کارساز ئەدهەم سانجاک بەرێ ئاكه‌پی بوو و پشتی ئاخافتنا خوە یا ل کۆنفەرانسا «ئەولەکاریا ترکیە و ناتۆ» کو گۆتبوو «ئەم ب پشتگریا ئه‌مەرکایێ بوون دەستهلات» ب ئارمانجا ئاڤێتنا ژ ئاكه‌پێ ئەو بۆ دەستەیا رێزکاریێ شاندبوون. پشتی ڤێ بریارێ ئەدهەم سانجاک ب خوە ده‌ست ئاكه‌پێ به‌ردا و 2ێ تەباخا ئیسال ته‌ڤلی پارتیا وه‌ته‌ن بوو.
پشتی لووتکەیا ل ئیرانێ و هەڤدیتنا سەرۆککۆمارێ ترکیێ رەجەپ تاییپ ئەردۆگان ل گەل پوتین مژارا سووریێ ل ترکیێ گەرمتر بوو و ئەردۆگان پشتی هەڤدیتنا سۆچی ئەشکەرە کربوو کو پوتین ژێره گۆتیە «هون پرسگرێکێن ل سووریێ ل گەل رەژیمێ چارەسەر بکن دێ باشتر ببە».
هەروها وەزیرێ دەرڤەیێ ترکیێ مەڤلوت چاویشۆگلو ژی د کۆنفەرانسا 13ەمین یا بالیۆزان ل ئەنقەرێ گۆتبوو «دڤێ ئەم ئۆپۆزیسیۆنێ و رەژیما سووریێ ب ئاوایەکی لهەڤ بینن. ئەگەر ئەڤ یەکنە بە ئاشتیەکە ماییندە چێنابە».
