فەرماندارێ ئۆپەراسیۆنێن هەڤبەشێن ئیراقێ تەحسین خەفاجی ژ مەدیایا ئیراقێ رە ئاخڤی و دیار کر کو قۆناغا پێنجەمین یا ئۆپەراسیۆنا “ڤینا پۆلا” کو داویا هەفتەیا بۆری دەست پێ کربوو، دێ چەند مەهێن دن بەردەوام بکە.
خەفاجی دیار کر کو د ناڤبەرا پێشمەرگە و فەرماندارێن ئیراقی دە پلانا ئۆپەراسیۆنێ هاتیە دەستپێکرن و گۆت، ل هەرێمێن دیالا و خورماتوویێ خەباتێن پشکنین و لێگەرینێ یێن ل دژی داعشێ دەوام دکن.
خەفاجی دا زانین، پێشمەرگە و ئارتێشا ئیراقێ گهشتنە خەتا تەماسێ و وها گۆت: «ئەڤ ژ بۆ هەر دو ئالیان ئارمانجەکە گرینگە. ژ بەر کو داعش ژ ڤالاهیا ئەولەهیێ یا ل ڤان هەرێمان هەیە سوود وەردگرە».
فەرماندارێ ئۆپەراسیۆنێن هەڤبەشێن ئیراقێ دیار کر ژی، پشتی زێدەتری سالەکێ ژ دانوستاندنێن هەردو ئالیان، باوەری د ناڤبەرا هەردو ئالیان دە پێک هاتیە و نها ب بەرەڤانیەکە هەڤبەش ئاخا ئیراقێ ل هەمبەر داعشێ تێ پاراستن.
خەفاجی بال کشاند سەر وێ یەکێ کو ئیراق و هەرێما کوردستانێ ل سەر ئاڤاکرنا ناڤەندەکە هەڤاهەنگیا هەڤبەش ل هەڤ کرنە و گۆت، «پێڤاژۆیەکە تەندروست د ناڤبەرا ئالیان دە دەست پێ کریە و ل گۆری مە دێ ئەنجامێن ئەرێنی ب خوە رە بینە».
