وەزیرێ دەرڤەیێ رووسیایێ سێرگی لاڤرۆڤ جارەکا دن نەرازیبوونا وەلاتێ خوە ل ھەمبەر ھەر ئێریشەکا ئارتێشا ترکیێ بۆ سەر باکورێ سووریێ و رۆژئاڤایێ کوردستانێ ئەشکەرە کر. د ھەمان دەمێ دا وەزیرێ دەرڤەیێ سووریێ گۆت کو ژ بۆ دانووستاندنێن لگەل ترکیێ مەرجێن وان ھەنە.
وەزیرێ دەرڤەیێ رووسیایێ سێرگی لاڤرۆڤ د کۆنگرەیەکا رۆژنامەڤانی یا ھەڤبەش دا لگەل ھەڤتایێ خوەیێ سووریێ فەیسەل مقداد راگھاند، ئۆپەراسیۆنا لەشکەری یا ترکیێ ل سەر باکورێ سووریێ و رۆژئاڤایێ کوردستانێ نایێ قەبوولکرن.
وەزیرێ دەرڤەیێ رووسیایێ سێرگی لاڤرۆڤ گۆت، رووسیا لگەل حکوومەتا سووریێ کار دکە کو رێ ل بەر ئۆپەراسیۆنەکا لەشکەری یا نوو بگرە.
ژ ئالیێ خوە ڤە، وەزیرێ دەرڤەیێ سووریێ فەیسەل مقداد بانگ ل حکوومەتا ترکیێ کر کو بەری دانووستاندنێن د ناڤبەرا ئەنقەرە و شامێ دا، “حورمەتا سەروەریا ئاخا سووریێ بگرن، ژ ئاخا سووریێ ڤەکشن و پشتگریا کۆمێن تەرۆریست راوەستینن”.
مقداد گۆت، “شام رێزێ ل ھەولدانێن ئیران و رووسیایێ یێن ژ بۆ نێزیککرنا ترکیا و سووریەیێ دگریت، لێ ھندەک ئەرک ھەنە کو پێدڤیە بەریا ھەر تشتی ئەنقەرە ب جھ بینە.”
وی راگهاند، “باوەری ب کەسەکێ نایێ کرن کو بەرێ پشتگرییا تەرۆرێ کریە”.
وەزیرێ دەرڤەیێ ترکیێ مەولود چاڤوشۆغلو بەری نھا گۆتبوو، د ناڤبەرا ئەنقەرە و شامێ دا ل سەر ئاستا دەزگەھێن ئەولەھیێ ھەڤدیتن و ھەڤکاری ھەنە.
وی ھەر وھا گۆت، چ شەرت و مەرجێن وان یێن پێشوەخت ژ بۆ دەستپێکرنا دانووستاندنێن لگەل حکوومەتا سووریێ نینن.
